陶大宇、蘇玉華、姚瑩瑩同岑寶兒等，噚日喺尖沙嘴海景嘉福酒店泳池拍攝無綫新劇《和味濃情》，劇情講述希望成為大明星嘅蘇玉華同岑寶兒明爭暗鬥爭上位，蘇玉華仲俾岑寶兒推落泳池，大宇於是奮不顧身跳落水救佳人。
陶大宇為呢部戲第二度落水，早排佢拍跳海戲，成頭濕晒後，地中海同M字額即刻現形，噚日大宇再落水就謹慎得多，見佢一上水就馬上用雙手護住個地中海，而且不時想將頭頂僅存嘅煩惱絲摷番鬆，希望睇落去可以濃密啲，不過仍然難掩佢嘅脫髮危機。
「除老婆可有朋友」
大宇其後接受訪問，講到好友歐陽震華俾人偷拍同年輕女子夜蒲，仲話佢一樣有婚姻危機，大宇好勞氣咁力撐好友話：「會唔會係佢屋企人呀？放假出去飲嘢玩吓好正常，呢個世界除咗老婆，都可以有朋友嘅。」
咁啱歐陽震華（Bobby）日前接受商台錄音訪問，又撐老友大宇離婚有理由，佢話：「總之合情合埋合法就冇所謂，佢係成熟男人，知發生乜嘢事，如果喺埋一齊唔開心，咁一齊都冇用。」
此外，曾與郭羨妮傳過緋聞嘅殼王陳國強噚日現身灣仔名人飯堂福臨門，如今郭羨妮再度以第三者姿態同陶大宇傳桃色新聞，問殼王會唔會撐佢時，殼王充耳不聞，一個箭步步入座駕，絕塵而去。
