以前左丁山有一個夥計，工作能力強，對佢負責嘅職務，單起隻眼都做得掂，可惜係一匹臭馬，經常扭計，以為公司冇佢唔掂，佢最鍾意跳草裙舞，兩三個月就講一次：「我想唔做咯！」左丁山一於詐諦聽唔到，直至有一次，佢再講：「我想唔做咯！」左丁山大喝一聲：「即管交封辭職信嚟。」佢立即掉頭鬆人。哈，過咗幾個月，佢搞到佢負責嘅部門運作極為暢順，人人讚好之時，佢竟然大膽到喺大老闆面前詐諦：「有人撬我，加好多人工，我想唔做咯！」點知大老闆二話不說，拎起電話對人事部講：「阿乜話唔做，你立即同佢計數，補多一個月㖭……」呢位夥計咁就冇得撈！
最近商界有人辭職，本屬平常，但引起好多傳言，都唔知邊一個版本係真嘅，最新版本來自一位賓架。賓架教訓左丁山：「你千祈唔好喺老闆面前跳草裙舞呀？」左丁山笑曰：「從未跳過，我以前試過幾次辭職，每次都做到最後一日，冇話立即起身鬆人嘅。𠵱家係自由寫稿人，邊敢跳舞吖，呢行最冇職業安全，老闆一聲話改版，我哋就要失蹤㗎嘞。」賓架話：「冇資格跳舞就要學擦鞋嘞。」乜擦鞋會襟撈啲咩？賓架話：「嗱，擺錢入你袋！做人夥計，如果交到差，甚至交功課交到加零一，就有資格學人跳吓舞，但唔好過份，如果交唔到功課，就要擦鞋，唔好下下頂住老細。講話『我想唔做』，一份工只能講一次，就係當你有更好嘅offer之時；呢句話，唔可以當拋浪頭㗎，喺老闆面前講呢句，因住由ManagingDirector變成MouDun！」
賓架咁多嘢講，都唔知係唔係有感而發，總之凡係打工仔，都要考慮呢個問題，越係大公司大集團嘅高層，越係位高勢危，你睇吓滙豐大班葛霖都因為業績不振而俾投資基金鬧到面青啦。打工仔經常要戒驕戒冒進戒守舊戒得罪老闆老婆或情婦，上市公司CEO更加要唔好得罪基金經理與傳媒，否則一旦落難，豈止冇人同情，更會俾人喝倒采。