英冠聯剩番4輪賽事，由前曼聯隊長堅尼執教嘅新特蘭喺前晚場聯賽以2:1反勝修咸頓，爬過咗打比郡頭登榜首，來季好大機會直升英超。到時堅尼同曼聯領隊費格遜嘅師徒對決，肯定成為城中熱話！
連續16場聯賽不敗
季初新特蘭試過聯賽4連敗，有本地傳媒仲話係主場光明球場鬧鬼所致，我求大俠諗番起都覺得好笑；咁現時堅尼帶領球隊獨佔鰲頭，係唔係因為佢煞氣夠？
點都好喇！堅尼帶隊教波確有一手，睇佢前晚黑色中褸、黑色西裝加埋黑口黑面喺場邊督師，但係又冇乜提場，而無論球隊失波定係入波都冇表情，真係不怒而威；唔怪得成班球員都醒醒定定，締造連續16場聯賽不敗，而堅尼本人更連奪2月同埋3月嘅英冠最佳領隊㖭！
當初新特蘭主席昆尼自己有球隊領隊唔做，搵堅尼返嚟執好隊波，都算佢有眼光，抵佢前晚喺觀眾席度睇到笑晒啦！現時新特蘭以1分壓倒打比郡，分別領先第3、4位嘅伯明翰同埋西布朗5分同9分，升班機會高唱入雲；咦！到時即係有機會曼聯1隊對曼聯2隊？