日頭返工經過7仔超市商場地鐵，鋪天蓋地都係佢嘅宣傳；夜晚返到屋企扭開電視，每隔10分鐘又傳嚟「ZeroZeroZeroZero……」，夠喇！入晒腦喇！最近Hit爆嘅Zero可樂，賣型賣健康，成功俘虜不少大人細路，尤其貪靚的女士們，一聽到零糖零卡就開心到當水飲！既然Zero呢期咁紅，一於就搵佢同埋其他幾款汽水煮幾味，睇佢又可唔可以突圍而出先！
記者：趙珮倩 攝影：譚盈傑、楊錦文
示範：劉傑盛師傅
怪師傅烹飪工作坊（23930622）
Zero叠影豆腐皮蛋
需時：5分鐘
價錢：$10/2人
材料：軟豆腐1磚、皮蛋1隻、Zero可樂100毫升、蒜頭/紅椒/芫荽各少許
做法：豆腐切薄片，鋪上皮蛋；蒜頭/紅椒/芫荽剁碎拌勻置碟邊，最後淋上Zero可樂。食用時，將皮蛋蘸上少許蒜頭/紅椒/芫荽。
知多啲：師傅話Zero可樂含甜味劑，若經高溫煮熱，味道會變苦，甚至產生化學物質，所以只適宜作冷盤食用，用來煮餸有局限。
小記評語：Zero可樂跟皮蛋的味道出奇地夾，有點像蘸上砂糖的食法，一樣係甜甜哋，但同豆腐就一啲都唔夾。
芬達魚柳
需時：15分鐘
價錢：$15/2人
材料：魚柳1塊、橙1個、芬達橙汁100毫升、鹽1/4茶匙、糖1/2茶匙、生粉21/2湯匙、胡椒粉少許
做法：先將魚柳以鹽/糖/胡椒粉/生粉2湯匙略醃；橙起肉切粒備用；燒熱鑊，將魚柳煎熟至金黃上碟；芬達橙汁混入2湯匙生粉煮成芡汁，淋上魚柳，最後鋪上橙肉即成。
小記評語：橙汁味濃，酸酸甜甜，味道似咕嚕汁，不過略為甜咗啲。
檸七雞翼
需時：25分鐘 價錢：$25/4人
材料：雞翼4隻、檸檬1/2個榨汁、鹽11/2茶匙、糖1茶匙、七喜100毫升、青檸1個
做法：先將雞翼以檸檬汁/鹽1/2茶匙/糖醃15分鐘；燒熱鑊下少許油，將雞翼煎至金黃，然後加蓋以中火焗4分鐘至全熟；七喜加入1茶匙鹽拌勻，淋上雞翼，最後放上青檸點綴即可。
知多啲：七喜加入少許幼鹽，作用在於降低甜味，據說更有清熱功效呢！
劉師傅評語：七喜加鹽後味道有啲似話梅，唔太甜，夾埋檸檬汁感覺好清新。
黃金忌廉球
需時：1小時15分鐘
價錢：$5/2人
材料：忌廉汽水100至150毫升、粟粉2湯匙、炸粉100克、麵粉少許
做法：先將粟粉加入3湯匙忌廉汽水，攪勻備用；餘下汽水煮滾，調細火，下已拌勻的粟粉汽水，不停攪拌至呈糊狀，冷凍約1小時。炸粉加入100毫升水拌勻備用；將忌廉糰上撒上麵粉，搓成長條狀，切成小塊，然後蘸上炸漿，以滾油炸至浮起即成。
小記評語：外面脆卜卜，個心軟綿綿，相當有趣；仲好重忌廉汽水味，相當醒神。
黑白爽凍
需時：2小時15分鐘
價錢：$8/1人
材料：檸檬可樂500毫升、魚膠片3克、火龍果1個
做法：火龍果開邊挖空，果肉切粒，留殼備用；將魚膠片以檸檬可樂浸軟，然後隔熱水坐溶；待完全冷卻後，冷凍約2小時，凝固後切粒。最後將果肉和可樂魚膠粒放入火龍果殼中即可。
小記評語：檸檬味突出，連火龍果一齊食，唔會太甜膩。
街坊撐硬原味
Zero可樂推出差不多一個月，周街都係黑潮，究竟一向貪新鮮的香港人又受唔受落？記者訪問咗一啲街坊，發現普遍被訪者認為Zero可樂好飲過CokeLight，不過始終不及原味可樂。
連小姐：「一推出就買嚟試，可樂味濃過CokeLight，但都係麻麻地，始終同原味可樂差得遠。」
莊小姐：「第一啖飲落去覺得Zero味道同原味差唔多，仲好似多氣咗，但慢慢覺得甜味好似怪怪哋，都係原味好飲啲！」
Joe：「之前飲開原味可樂，但怕肥唔敢飲咁多；Zero標榜無糖零卡，味道又同原味幾似，所以會轉飲Zero。」
Peggy：「黑色包裝好有型，但始終唔夠傳統可樂好飲，甜味好假，不過都好飲過CokeLight。」
飲唔肥人也蛀牙
雖然Zero標榜零糖零卡，唔會飲肥人，但專家指Zero與原味可樂、CokeLight一樣，含酸度調節劑磷酸（E338），而Zero中含檸檬酸（E331），屬中酸性飲料，經常飲會令牙齒變黃，破壞牙齒琺瑯質，容易導致蛀牙。所以，飲時飲，都係適可而止好啦！