香港上市公司嘅大股東除咗做揸fit人，通常都係人工最高㖭，不過，華華睇利豐本年報，05年最高人工嘅董事總經理馮國綸，雖然舊年人工加咗10.5%到1640.7萬，但埋單計數竟然俾夥計扒咗頭；佢大佬主席馮國經人工仲冇得加，年薪照舊37.9萬。
邊個夥計咁猛料？咪就係歌手李玟嘅老外未婚夫、利豐總裁Bruce（樂裕民）囉；佢舊年連獎金嘅總薪酬約1768.9萬，多過細馮馮國綸成128.2萬銀。
就算唔同細馮比，Bruce舊年嘅年薪都比05年勁升94.86%，升幅差唔多1倍。而除咗Bruce外，有一名冇披露姓名、又唔係董事嘅員工，舊年年薪最多有成1150萬，較05年最高人工而又冇披露姓名嘅員工，多咗超過四成，真係羨慕死人。
華華記得細馮講過，佢絕對唔介意有夥計嘅人工高過佢，最緊要係幫到手。咁梗係啦，只要夥計做到嘢，每年細馮收嘅股息一樣水漲船高，條數真係除笨有精！
[email protected]