時間：99年3月10日
人物：黎明
地點：佐敦QSound錄音室
經過：做藝人經常要承受壓力，貴為天王嘅黎明唔會例外，98年佢同舒淇合作拍電影《玻璃之城》撻着，不過歌迷好抗拒舒淇做黎明身邊嘅女人。99年3月10日凌晨，黎明就被誤傳因舒淇提分手而仰藥入咗養和醫院，仲話昏迷9粒鐘，黎明事後堅決否認。
「對生命充滿熱誠」
為咗平息風波，黎明嗰晚終於出面去見記者，佢話：「我唔知邊個傳呢個消息，傳得咁唔清楚，令大家白行一趟。我只係一個歌手，唔係偵探，唔通聽日有人話我去鵝頸橋耍雜技，我又要出嚟澄清？傳聞成日有，解鈴還須繫鈴人，靠記者支筆寫番好，靠藝人本身冷靜解決。」黎明第二日又喺唱片公司見記者，佢重申：「我對生命充滿熱誠，我係唔會自殺，呢啲頭條唔上都罷。」當時講到舒淇，佢只承認大家係朋友關係。
黎明同舒淇呢段情已經變成過去式，黎明𠵱家同新歡樂基兒鬼咁恩愛，連啲歌迷都接受到二人嘅情侶關係。佢哋感情咁穩定，睇嚟樂基兒好快會成為黎明嫂嘞。
本欄逢周一至周六刊出