時間：95年5月1日
地點：無綫電視城八廠化妝間
人物：黃日華
娛樂圈男女藝員戲假情真屢見不鮮，好似陶大宇同郭羨妮一吻定情，斷送同老婆黃慧寶17年情，同樣婚姻曾出現暗湧嘅黃日華早前仲批評大宇咁做好失敗。
黃日華同太太梁潔華拍拖7年，88年結婚，梁潔華淡出幕前轉投保險工作，兩人婚後甚少傳出緋聞，不過喺95年，華仔同蔡少芬參演無綫劇集《包青天》嗰陣傳出緋聞，件事仲令華仔同梁潔華發生拗撬。
話說事發時，華仔同太太啱啱通完電話，一時激動，揮拳打爆化妝間嘅玻璃，右手血流如注。之後華仔被送入浸會醫院，當時佢右手手掌大拇指對落留有1.5吋長、兩分深嘅傷口，要立即縫針。
妻傳婚外情
事後華仔承認曾為緋聞一事唔開心，又為自己嘅鹵莽行為感到後悔。翌日佢接受訪問時話：「噚晚太太係打過電話嚟，不過唔關緋聞事，我打爛玻璃純粹係拍《包青天》拍得好辛苦，太大壓力。」
平穩過渡緋聞風波之後，00年輪到梁潔華被傳與保險同事過從甚密，慶幸兩夫妻都能互相體諒，終於雨過天青。
本欄逢周一至周六刊出