養馬，係上流社會身份象徵，咁好彩養到隻「馬王」，贏大錢之餘，更加係光宗耀祖，所以馬主一般都會將愛駒視如己出，畀佢最好嘅，退役之後，又安排佢哋去外國牧場安享晚年咁，一般理解，如果畜牲都錫到咁，「馬王」主人梗係愛心爆棚，人品唔慌差，但事實又係點呢？
好似收租佬咁，錢的確大把，但就成個暴發戶咁，養馬講明係為咗肯定佢嘅富豪地位，但又咪理，絕對唔識欣賞馬嘅佢，好鬼好彩，養親都係極品，恨死隔籬，而佢個二世祖乖仔，亦秉承老竇嘅暴發戶精神，不住將威水史發揚光大。
話說二世祖響楓葉國讀完書（其實係hea）返香港後，由於未夠班接棒，於是就問伯爺攞個舖位做小生意，但間舖日日拍烏蠅，最大用途就係畀佢同班朋友、擦鞋仔吹水睇跑馬。
有次班少爺仔吹水，講起二世祖橫掂大把錢，又唔怕蝕，間舖又一定唔會摺埋，有人提議，應該畀多少少錢幾個夥計，等佢哋畀多啲心機，睇實呢個私竇。點知二世祖話，錢唔係冇，養隻馬每個月閒閒地使幾皮嘢啦，之但係幾個夥計搵錢能力唔及隻畜牲，所以，幾千蚊個月已經畀多咗．．．大家聽完先係deadair，然後繼續廢噏！
米飯不可浪費
班少爺仔話，佢哋呢啲有家底嘅闊少，脾氣臭好平常，但甚少好似二世祖咁鬼冇品，當面將夥計踩到連畜牲都不如。佢哋仲話，二世祖講過啲馬如果贏唔到，就拎去做狗糧，絕對唔容許浪費米飯，唔知係咪佢同啲馬都講過呢番說話，啲馬唔想淪為罐頭，就搏晒老命跑，所以話呢，畜牲真係有靈性㗎！
[email protected]