喺日本紅爆12年嘅爆笑卡通片《我們這一家》，片中主角花師奶瘋魔日本台灣兩地，最近呢套爆笑卡通喺無綫推出，又掀起熱潮。曾經喺《阿旺新傳》獻唱嘅湯盈盈仲俾無綫欽點唱主題曲，噚日佢去到元朗出席復活節活動時公開獻技，仲一改性感形象示人，實行開拓兒童巿場。
望奪兒歌金曲獎
湯盈盈話《我們這一家》主題曲雖然只係兒歌，但佢都認真對待，演出前幾日已經不停喺屋企練習。話晒今次係第一次現場表演唱歌，所以盈盈非常緊張，就連發夢都哼住首歌，佢仲話對首歌抱有好大期望，希望可以喺今年嘅《兒歌金曲頒獎禮》攞獎㖭！
苦心鍛煉歌藝之餘，為咗親近小朋友，噚日盈盈仲一改以往嘅性感形象，特登着高領口嘅衫，以密實形象示人，佢話咁樣可以方便抱小朋友又唔走光喎。至於點解無綫搵佢唱主題曲，原來因為佢係無綫現任嘅兒童大使，所以就由佢嚟唱，同時可以畀佢有多方面發展，唔使俾所演角色定型喎！
