國際金融大鱷索羅斯話，隨着全球暖化，加上能源危機正在擴大，乙醇（ethanol）等替代能源會越來越重要，所以佢決定進軍巴西乙醇業。有網友喺《SuperiorInvestor討論區》問：乙醇股值唔值得吸納？
Kloewer講：「我喺05年中買入加州乙醇提煉公司PacificEthanol（PEIX）嘅股份，當時每股只係8美元，9個月後已升到40美元，足足暴漲4倍，跟手放晒啲股票，趁機食糊。計我話，佢嘅股價已經反映所有利好因素，短期內好難大升，所以我暫時唔會再掂。」
Corey話：「用嚟生產乙醇嘅玉米不斷漲價，會損害乙醇製造商嘅盈利，不利股價表現。」bigmike就反駁：「幾年後可能發展出更先進嘅乙醇生產技術，所以乙醇股值得長線投資。有關股份如果有回吐，正好係趁低吸納嘅良機。」
見回吐 趁低吸
newinvestor123亦睇好乙醇股，佢推介乙醇生產商AventineRenewableEnergy（AVR），因為呢隻股票現時較52周高位低成50%，市盈率（PE）只有10倍，近期走勢亦已經好轉。佢話，由於美國布殊政府鼓勵國民使用乙醇等替代能源，仲對乙醇生產提供補貼，所以唔應該過份睇淡乙醇股。
至於最近喺香港上市嘅乙醇股中糧控股（606），分析師睇好佢有母公司注資概念，而且業務獲得中國政府支持。