一早都已經同阿妹娛思講咗，話如果要搵啲外國或者好舊嘅汽車廣告，上去YouTube搵吓咪有囉！嗱，好似我咁，早兩日就喺YouTube搵到一條講VolkswagenBeetle嘅廣告片；片中主角係一部舊款Beetle，當佢喺廢車場見到兩個工人拎住「架生」對住自己嗰陣，即刻合埋雙眼同埋歎氣，心諗今次死梗！跟住就諗番喺59年嗰陣，第一任車主Maria同James帶佢返屋企嗰時嘅開心情景，跟住轉手再轉手，然後去到一位印巴籍人士手上，兼且仲做埋佢嘅結婚花車㖭！
呢部Beetle足足喺呢個世界度過咗48個寒暑，到咗今日都只係俾人幫佢改頭換面，變身做一部開篷Beetle啫。哈，諗番以前啲車真係襟用好多，唔似今時今日啲車得幾年貨仔咁短癮，可能舊車無咁多電子嘢啩！
網址：www.youtube.com/watch?v=y_ANpajbyvk
悠穎馳：豪邁不羈，愛車如命，聽幾下引擎聲就知咩車！