中石化首季業績預期升五成以上，難怪董事長陳同海噚日喺記者會心情靚極，一直笑容滿面。
會上有人問到中石油旗下、北京以至廣東地區部份加油站，早排以「春季酬賓優惠活動」做藉口，同外資加油站打減價戰，但中石化啲加油站好似冇反應，究竟點解？
自比Exxon同Shell
陳同海好自信咁回應話：「我哋為咩減價？中石化係繼Exxon同埋Shell之後，全球煉油能力第三大嘅石油公司，雖然煉嘅原油質量最雜，但係煉出嚟嘅成品油質量好靚，舉個例，我哋賣嘅90號汽油，就等於92號嘅質數，咁點解我哋要減？」
可能見中石化企硬唔減，咁冇幾耐中石油總部亦緊急喝停，各加油站喺4月9號零晨開始收番正常價。其實呢兩大巨頭，喺內地仍然壟斷市場，到舊年底，中石化擁有約2.88萬座加油站，中石油亦有約1.82萬座，外資剛啱先至獲准進入中國市場，可以話有排都未係佢哋對手。
陳同海又話，舊年12月中石化每日賣出成品油30萬噸，到今年2月升到32萬噸，𠵱家每日賣成34萬噸，銷售同分銷業務部每個月提供嘅稅前利潤，亦由20幾億人民幣增加到成30億銀人民幣，證明減價事件對佢哋冇影響喎。
唔怕冇自主權
唔單止咁，佢仲話：「曾經有個官員問我，將來零售市場開放，啲油由邊個嚟定價？我就答佢：『由我嚟定價！』」內地人最擔心定價冇自主權，但係陳同海就信心爆棚，華華都要講句佩服！佩服！
[email protected]