八方個幾禮拜前講過，特區政府近期好鍾意用歌曲搞政治宣傳，最近就搵咗喺柏林攞獎嘅金培達作曲、群星合唱嘅《始終有你》，做回歸10周年嘅主題曲。其實，政府上年搵Gigi、Kelly同克勤唱《熱愛基本法》效果已經唔得，但八方聽聞，有政制事務局嘅高官曾經建議過為呢首歌推出卡拉OK版，真係嚇死人。
唱K學愛國
製作呢類愛港歌其實好浪費公帑，香港人根本冇共鳴，但政府唔止冇檢討，仲打算變本加厲，大力推銷呢啲歌！好似《熱愛基本法》咁，八方聽聞有位擦鞋高官開會時提議，不如推出卡拉OK版本，等啲後生仔可以一邊唱K、一邊學習熱愛基本法！
好彩，仲有啲有良知嘅官員，對時下K場文化有啲了解，誓死反對呢個建議，個建議先至冇下文。否則，到時啲K房可能貼滿晒Gigi、Kelly同克勤張大頭相poster，背景係一本紅噹噹的《基本法》，大大隻字寫住「熱愛基本法」，下面就係「啤酒特價3支$20」，咁唔單止破壞晒唱K嘅氣氛，仲連《基本法》嘅莊嚴都破壞埋。
K場冇得唱
不過，原來賀回歸10年嘅《始終有你》已經有個卡拉OK版MV。八方噚日特登打過電話去啲卡拉OK，問：「呢度有冇得唱《熱愛基本法》同《始終有你》？」啲職員冇媽叉八方嚟混吉，亦冇即刻cut線，仲好有禮貌咁同八方講：「我哋要搵搵先，如果有得唱，使唔使幫李生訂埋房？」最後嘅回覆就梗係冇得唱啦！
加州紅老闆駱國安同八方講，佢哋冇呢啲歌唱，因為啲版權喺政府度，政府又冇同佢哋聯絡，叫全線加州紅推出《熱愛基本法》同埋《始終有你》，如果政府同加州紅傾傾，呢啲歌都可以擺埋落個歌庫度嘅，但佢哋要上榜做熱門K歌，就難啲咯！
安哥仲話，話唔定有啲人都會貪得意，喺7月左右唱吓《始終有你》應吓景嘅，但除非全線加州紅大力推啦，呢隻歌要hit真係好掹水。