好耐冇試過迫爆閘嘅廸士尼樂園，由美國過江嚟香港之後，雖則點都唔及海洋公園咁受歡迎，但同國內啲乜乜樂園拼埋就超晒班。旁邊嗰間搵卡通人物做主題嘅酒店仲揮低晒啲老土國貨，噚日攞咗個「中國最具代表性主題酒店獎」。不過八方發現呢個極可能係豬肉獎，皆因數埋有成33項，有啲仲一開十，即係隨時有一百幾十間酒店有豬肉分，聽落唔多矜貴。
查實國內都有唔少主題酒店，題材都係文化、山水、溫泉或者古城，梗冇全球通行嘅米老鼠咁好sell，加上門口通常有大把窮人等拎着數，客人睇見心噏。廸士尼就醒嘞，獨霸大嶼山竹篙灣塊地做土皇帝，擔保啲客見唔到唔應該見嘅嘢，難怪咁鬼成功。同胞們，學嘢啦！