𠵱家好多打工仔都知道未雨綢繆嘅重要性，明白要儲多啲錢傍身、要投資將資產增值，為將來嘅退休生活作好準備。之不過，並唔係所有人都精於此道。《Money》雜誌網上版就提供咗幾個理財貼士同步驟，教繁忙嘅都市人點樣用少少時間處理同錢銀有關嘅煩惱。
根據《Money》雜誌嘅講法，要改善或處理個人嘅財政問題、分配資產，其實可以DIY（DoItYourself），唔一定要搵理財顧問先做到。
基本動作 應付突發
首先係設定自己想退休嘅時間，除咗強制性嘅退休供款之外，每個月都要將人工嘅10至15%儲起。
第二步係按個人需要及可承受嘅風險訂定投資策略，將部份儲蓄投資喺股票或債券市場。方法一可以利用網上嘅軟件輔助，揀選較適合自己嘅投資組合。如果毫無頭緒，方法二可以買股市指數基金或債市指數基金。
另外，福禍無常，以下3項基本動作可以幫你解決好多意想不到嘅問題：
一、預留一筆錢作為緊急基金：建議當中至少有可以作為3個月生活費嘅現金，以備不時之需，但若你係家庭嘅唯一經濟支柱，呢筆現金應該至少要足夠應付全家半年生活開支；
二、購買人壽保險：買咗保險就可以將個人風險分攤，唔需要擔心因疾病或意外傷殘、甚至身故而影響咗自己或家人嘅生活。至於壽險嘅保額，就要視乎投保人本身有幾多資產、每年嘅入息、家庭總開支及負債多寡而定；
三、預立遺囑：立定遺囑可以保障家人獲得遺產，減低資產遭政府凍結嘅機會。如果有年幼子女嘅話，至少要為佢哋安排監護人。假如財產分配情況複雜，建議搵律師代勞！