趁假期「做嘢」而推出所謂宏調，係大陸一貫「習慣」，散戶不妨翻查年內多次有關大陸加息或調高存款準備金率，就知大陸經常趁假期「做嘢」。今次人行在清明節當日將銀行存款準備金率調升至10.5%，星俠以為對港股或內地A股影響有限，大市仍會維持升浪。
理由很簡單，上次人行加息，深滬股市略為調整後，A股指數至今屢創新高，加上QFII年內屢次獲提高額度，外資進入內地金融市場有增冇減，至於當局藉調高存款準備金率以抽緊銀根究竟有冇效？如果有效，就毋須加到第6次，故此星俠相信，內地股市將依然熱爆，促使人行於年內第2次加息，到時股民再驚都未遲。個人估計，大陸今年最多加息3次。
港股去年升上20000點，但升幅集中在H股、大價股及個別藍籌股，現時大市仍在高位徘徊，二三線股價相對仍低，故市場資金追捧細價股理所當然。假期前成功脫離「仙」班的華億新媒體（419）升浪已成，料可突破52周高位0.108元。
挑戰52周高位
華億間接持有北京保利華億傳媒文化50%股權，並由「內地傳媒大亨」之稱的董平掌舵，去年中期實質盈利達9000萬元。華億最近向CBC控股的SpeedySwift配售新股，每股作價0.065元，坊間傳聞接貨者如冇1倍升幅都不會罷休，即華億可以見0.13元，真係信不信由你。