若然問每次通頂會做啲乜？毫不猶豫，我會答：煲碟、打機、睇漫畫、開枱……意思唔係指從未為工作而捱更抵夜，但要說一聲衷心嘅「我願意」，肯定玩字當頭！深宵上WiFi，以前去網吧經常做，之但係有嘢食、有地方Hea、唔使錢俾你上Internet服務，邊度有先？冇錯，咪24小時麥記囉，你只要拎住部PSP、Notebook或者手機，開着WiFiSearch一轉，唔使Login就能夠免費上網。唔信？你即刻走去試吓！
記者：陳國輝
攝影：何家亮
Model：King、Maggie
全港49間聯群結黨Hea餐飽
平日做嘢已經忙到嘔，夜晚想搵地方Hea吓，到Cafe飲番杯兼上吓網，唔走到油尖旺，幾乎搵唔到！簡單講句，玩WiFi最蝦人，除非你乖乖哋留喺屋企，足不出戶，否則晚上想到Starbucks、PacificCoffee等地方上網，只有吃閉門羮。24小時麥記都想得幾周到，除咗日頭，連深宵時分都提供WiFi，最啱一班「無家想歸」嘅電車男，聯群結黨Hea餐飽；更體貼係全港Total有49間，分布晒港九新界各區，就算你住喺幾乎拍得住DiscoveryChannel咁遠嘅天水圍，一樣有間喺附近，夜麻麻去Wet，仲使乜劈亡命Van出市區呀！
唔使Login有機即上網
好多地方話自己提供免費WiFi，雖然用佢個Hotspot唔收錢，但講到底你要申請服務先用得，最平嘅y5zone「OneDayPass」都要$15，淨係諗住Check個E-mail嘅話，咁咪好浪費？用手機Check仲慘，逐Kb、計埋GPRS，如果有Attachment就收得仲貴！
24小時麥記好處係完全免申請，打開部機上WiFi主頁，經兩、三個步驟確認就玩得；但唔係無限任玩喎，每部機只提供上限20分鐘，過咗就要等第日，不過齋Check電郵加覆信，應該夠時間。
實試StepByStep！
現場反應：唔知囉
我住喺附近，間唔中都會落麥記食嘢，但係從電視廣告，我只知道24小時營業，完全唔知佢裝咗免費WiFi。
早就聽聞過McDonald安裝WiFi，一直以為同一般Cafe咁要收費，原來每日有20分鐘唔使錢Login，筍喎！
我慣咗夜晚先玩MSN，有時深夜肚餓嗰陣，亦會刻意到24小時麥記買啲嘢食，有埋WiFi點都方便啲。
我自己都用WiFi手機，知道有20分鐘唔使錢Login，都幾有吸引力，不過20分鐘一陣間就過，可以做啲咩呢！
得20分鐘究竟有乜玩？
單撈Trailer
Apple網入面經常有新片Trailer，佢勝在種類多，而且Streaming速度好快，試過睇晒呢齣仲未上畫嘅《TheDogs》，全程冇窒格。
網上開枱
OnlineGame唔一定係打打殺殺，男女老幼都啱玩嘅遊戲，首選係網上麻雀，去麥記玩點嘈都唔怕驚動屋企人，不過未打夠一圈就斷線。
煲電視節目
現時SONY就為PSP提供Online服務，呢項綜合頻道包括咗TVB節目、電影及卡通3大類，月費都係$22，平平哋每晚煲一節都唔錯喎。
打情信E-mail
日頭寫「E貓」可能係工作需要，冇辦法！但係深夜玩「E貓」又係另一樣嘢，20分鐘唔多，但足夠你寫百字情書冧女兼Check郵件。
搵FriendMSN
玩MSN冇時間限制，長有長玩、短有短玩，如果你用Notebook嘅話，仲可以睇埋對方個樣，比起平時喺街用手機玩，慳番唔少GPRS費㗎！
WiFi必備四潮物
Notebook
整體表現當然以佢最掂，睇串流電影、打OnlineGame毫無難度，不過咁重，有邊個會成日拎佢出街先？
PSP
升級上最新版本之後，支援繁體中文瀏覽器，睇埋廣東字都冇問題，不過輸入網址一味要逐粒字母揀，好煩。
NDS
任天堂喺舊年推出咗一套「NintendoDS瀏覽器」軟件，拎支Stylus篤篤吓就玩到，可惜唔支援中文。
WiFi手機
好多機種已配備WiFi，當中以PDAPhone最多，但隨住潮流Hit呢樣分唇，像E65呢類Smartphone亦內置埋。
查詢： http://www.y5zone.com/
