豪宅嘅定義已經被無限擴大，甚至乎無處不在，一個唔小心就會真假豪宅難分，krisyip早前喺《香港討論區》列舉咗10個新近樓盤，叫網友投票邊個豪宅最假，最後投票搞唔成，但網友反而各抒己見。
有錢人通常住得好寬敞，單位密度低先保持到私隱，諒虜之父有感而發：「幾百個單位質埋一座樓，全部都不能稱豪宅。」
單位要千五呎以上
Joe1970反對：「原來高樓大廈多單位就唔可以係豪宅，咁中半山地利根德閣、陽明山莊、禮頓山都唔係囉喎。新界小鄉啲村屋就係豪宅。」
另一邊，網友chaulapkei提出較具體嘅定義，佢話：「豪者，大也，間屋一定要夠大，500幾600幾呎算咩豪宅？起碼要千五呎以上啦，大門要係子母門，要有工人房、工人廁，要有後門畀工人出入。」
唔止咁，佢認為單位內配套設備一樣要齊，例如「要有雜物房，主人房要有衣帽間，個套廁要有兩個洗手盆，有按摩浴缸同企缸。不過，對屋企啲貓貓狗狗嚟講，五六百呎或者算豪。」
城堡+鬼妹+英文歌
Wingwing514諗起近年啲樓盤廣告，大都睇唔到真樓盤，實用資料就更加唔使講──係冇，完全係概念廣告，佢因此有感而發咁話：「𠵱家個個樓盤都話自己豪，啲廣告又九唔搭八，咩貴族生活、皇族氣派，你估買城堡咩。拍個冇實樓睇嘅廣告+幾個鬼妹+一首英文歌=豪宅？」
jessie888同意：「住得起豪宅嘅人始終都係少數，如果唔係就唔矜貴，但係吓吓賣樓都係豪宅價錢、公屋地區、居屋質素，咁就好難頂。」 http://www11.discuss.com.hk/viewthread.php?tid=3814856&extra=page%3D1&page=1