美國人力資源調查機構ChallengerGray&Christmas今年1月進行嘅調查發現，超過3000名來自各行各業、去年轉過工嘅經理，當中92%嘅受訪者喺跳槽後嘅人工、福利都比以前增加或相等，職級亦有晉升，呢個百分比更加係97年以嚟最高。正所謂「有錢使得鬼推磨」，打工仔係咪真係咁現實呢？
由《CNNMoney.com》進行嘅一項調查顯示，有份投票嘅1.4萬名網民中，超過半數受訪者話如果要轉工，新職嘅人工一定要多過𠵱家先會考慮，只有31%受訪者認為工作嘅滿足感比賺錢更重要。
老留人施彈夠闊綽
下星期就轉到另一間公司工作嘅Mike，喺討論區留言話：「新公司畀嘅底薪雖然只係較現職多7至8%，但花紅就係𠵱家份工嘅一倍。」
Vikram認為加薪嘅幅度好視乎市場嘅供求情況：「我最近轉咗工，薪酬比以前超過五成，仲簽訂咗有花紅分嘅協議。老闆急需請人幫手，出手自然闊綽。」David加把口：「我諗住賺多啲錢，咪轉工囉！點知𠵱家個老闆想留我，即刻加到我想要嘅薪酬水平，早知係咁，我一早就應該跳『草裙舞』博加薪啦！」
過塘增肥 應先自我增值
網友Scott就話：「俗語都有話：『魚唔過塘唔肥』，所以如果想人工大幅度提升，就要搵機會轉工。不過，我覺得有一點都幾重要嘅，就係打工仔一定要自我增值，先至會有籌碼喺職場上爭取更好福利。」
Joseph亦認同：「我大學畢業後做地產商會計，過去8年轉咗5次工，每次轉工嘅加薪幅度係之前份工嘅底薪再加52%、25%、10%、50%及30%。其間我不斷增值，考獲工商管理碩士。
佢仲話：「對我嚟講，搵工跳槽係在職生涯嘅指定動作，因為同一間企業每年平均加薪3%至5%，未必及得上另一間公司提出嘅條件吸引，但打工仔首先要不斷提升自己嘅教育水平，累積工作經驗，咁至可以增加轉職機會、搵多啲錢！」