談玩具、講Figure，怎能不提揚威美日的MichaelLau（劉米高），其GardenerFigures創造潮流，寫上玩具界傳奇的一頁。愛玩具才會做玩具，由跟G.I.Joe談戀愛開始，令玩具變成他的生命。由讀Design、打份工，到擁有自己的玩具天堂，玩具在他眼中是甚麼呢？MichaelLau為你細說他的戀愛經過。
記者：許維雅
攝影：周旭文
「玩G.I.Joe，最多變化！」
我由細到大都喜歡G.I.Joe。就玩具而言，軍事公仔屬最多變化、多配件，又可以換衫，係最抵玩嘅一種！初初出嚟做嘢都唔夠錢買㗎，成千蚊一個，咪得閒就去玩具舖睇睇逛逛囉，望吓都好。
到94、95年，香港經濟好好，開始搵到錢，又多Freelance做，就買得最瘋狂，愛得最沉迷。由那時開始，我已認識阿庭（前LMF成員），因為大家都係G.I.Joe迷，周不時一齊研究。以前買玩具冇𠵱家下下上網買咁方便，要周圍搵，又會睇吓玩具雜誌有冇人放玩具，再去啲舖仔度摷吓咁，結果買埋一大堆散件。然後再睇書，自己砌番一盒原裝完整版本出嚟，當中尋找樂趣其實好大！到後來玩得多，就開始想自己做。有啲手手腳腳剩低，開始慢慢試吓左砌右砌。
到阿庭當年出Anodize大碟（大碟名喚作《ActionFigure》）時，佢話：「影我哋個樣，人哋都唔知我哋係乜水啦！」就提議我不如做幾隻公仔來做唱片封套。我覺得當時玩具界的確缺乏Hip-Hop、潮流元素Figures，於是決定開始認認真真做Figure。戀上了G.I.Joe，令我對做玩具產生興趣。可以咁講：冇G.I.Joe，就冇我MichaelLau！
「愛舊版Playmobil簡單！」
今次你話想影我啲舊玩具，我求其執咗兩箱嚟咋，只係冰山一角。咁多玩具，啓蒙我嘅當然係G.I.Joe。此外，我亦特別鍾情舊版Playmobil。
細個邊有錢買玩具吖，到自己搵到錢，不自覺就會想買番一些舊版玩具，追回細個得唔到嘅，或者咁叫做情意結啩！懷舊玩具總有種難以形容的吸引力，無論字體、包裝，構圖都會令我着迷。當然其最大吸引之處在於罕有，越難搵，自然就越矜貴。我特別鍾意儲舊版Playmobil，佢哋真係好犀利，線條咁簡單，但可以造出咁出色的效果。每一個人仔、動物同配件都十分神似，那種令人感覺得意嘅視覺效果總會帶給人歡樂。
自從自己做玩具之後，都買少咗好多，係有時上網咁啱見到一些罕有舊版先會買。我相信儲懷舊玩具呢種玩意遲早沒落，因為𠵱家個個小朋友都只喜歡打機，對玩具興趣不大，再過幾年，仲邊度有人儲舊玩具吖！
「呢個世界總有儍仔！」
我儲玩具瘋狂？𠵱家唔算，最癲時成千蚊個吉盒都買過！
玩具就係咁，多人要咪有炒價囉。玩具都有潮流，過咗氣咪跌價囉，我嗰啲都係㗎！哈哈，𠵱家已經過咗最癲嗰一浸啦！我自己出嘅玩具被炒高炒低，我唔介意，呢個世界總有儍仔啦！我都係儍仔吖！
但我儍唔晒，每樣嘢喺心中都應該Set個價，市場好公平，有人賣全因有人肯買，自己想要又覺得值呢個價錢，被人炒高咗又何妨！其實排隊買我Figure嘅人，邊個係Fans邊個係炒家，我都認得晒。Fans成功買到時對眼會發光㗎！會唔會唔高興唔係Fans幫襯？唔會，佢哋可能係下一代嘅年輕企業家！
