自從方正做咗證監會主席後都幾低調，但會計師公會叫到，話晒會長係細佬方中，冇理由唔講番幾句。方正喺最新一期公會月刊話，早一兩年，證監前主席沈聯濤對分拆主席一職好有意見，亦有人擔心新主席同行政總裁能否合作，不過，方主席話佢接任就快半年，唔覺得有問題，因為佢好清楚自己角色係非執行性質。
方主席又話，其實佢識咗沈聯濤超過30年，兩人初出道時都喺倫敦嘅會計師行一齊實習，不過後來沈聯濤去咗世界銀行做，最後轉做金融監管。
講開會計，方正屋企係名副其實嘅會計世家，哥哥方俠同細佬方中都係會計師，連方正老婆方黃吉雯都食呢行飯，但方正個女冇跟大隊，喺大學主修化學，不過最後都入咗金融業，做投資銀行家。
[email protected]