哈哈，時間過得真係快，嗰頭先過完農曆新年，跟住連復活節假期都過埋，快得真係誇張；不過，覺得時間過得快嘅唔止係你同我，就連瑞典嘅Volvo都係咁話，點解？因為今年係佢哋嘅80歲大壽嘛！
由1927年4月14日，第一款名為OV4嘅汽車離開車廠嗰一剎那開始，Volvo便正式踏入汽車生產行列，雖然當年廠方曾訂下開篷嘅OV4，同埋有篷頂嘅PV4各自每年生產500部嘅目標，可惜首年只係賣出297部，同佢哋訂下嘅目標相差甚遠；不過廠方並無因為咁而灰心，反而繼續落力研製新車，例如1947年嘅PV444、1957年嘅Amazon同埋1967年嘅Volvo144。
至於到家陣我仲鍾意嘅Volvo車款，我諗都係嗰款240車系，因為嗰時覺得部車好有貴氣，坐落又舒服（當然家陣啲新車仲Grand、仲好坐啦！），完全Fit晒車迷嘅要求。吖！唔知香港代理會唔會搞返啲慶祝Volvo80周年嘅活動呢？
悠穎馳：豪邁不羈，愛車如命，聽幾下引擎聲就知咩車！