唔做四大會計師行而做咗幫辦嘅會計Ｙ去日本旅行，唔跟團返香港，多留兩日東京，叫肥仔Ｋ幫佢搵到一間幾千日圓一晚嘅青年賓館，慳番酒店房租唔少。肥仔Ｋ帶會計Ｙ去青年人最喜歡嘅地方，就係原宿、涉谷、六本木、秋葉原。而香港人最喜歡嘅地方，就係去築地食魚生。肥仔Ｋ與會計Ｙ入到築地壽司清，只見坐滿睇旅遊地圖而來嘅香港人，壽司店內廣東話大晒，遊客多數係食Ａ餐、Ｂ餐，只有肥仔Ｋ可以講日文，自行點菜。
築地係魚市場，食刺身最新鮮，去到築地，唔食toro就笨。最靚嘅toro來自墨西哥對開嘅太平洋，鄰近加州聖迭哥。墨西哥魚場日日搵沙甸魚餵tuna魚，餵到肥肥大大，就捕魚上船，七十二小時內運到東京築地，肥仔Ｋ佢哋食嘅toro就係咁新鮮嘅。
每年咁多遊客去築地，日本人亦去，所以築地為漁商、街市攤檔帶來大量收益，我哋嘅油麻地果欄完全唔係嗰皮。東京魚市場原本位於東京中心區「日本橋」，有三百年歷史，一九二三年東京大地震，震散咗魚市場，故此搬去築地重建，到𠵱家又有八十年咁耐咯，佢嘅共同回憶價值，當然非香港天星碼頭可比。
點知今年係選舉年，肥仔Ｋ話世事出人意表，競選連任嘅東京市長（東京都知事）石原慎太郎竟然建議拆遷築地魚市場，將市場搬去東京灣新填海地區；石原慎太郎雖然已經七十四歲，但仍然希望申辦二○一六奧運，以刺邀東京基建，計劃之一就係將築地市場改建成為奧林匹克媒體中心，安置各國記者。
選舉日喺四月八日舉行，今日就知道石原慎太郎會否連任；事先預測話佢會贏！香港有人反對清拆天星碼頭，你估東京有冇人反對拆遷築地市場呢？市場中人就憤怒抗議，話搬去東京灣相等於摧毀一個生氣蓬勃嘅社會生活形式！拆唔拆，唔到我哋香港人話事，石原連任嘅話，大家去東京就快啲去吓築地先咯。