雖然仲有成年幾先立法會選舉，但各方人馬已經暗中鬆踭撞膊爭好位，上屆有九男女參選、亂過亂世佳人嘅會計界，喺7.1效應下畀「民主師奶」譚香文成功上位，界內保守勢力好多人條氣仲未順番，誓要奪回江山。會計師公會前會長陳茂波本來狀態大勇，點知前排踩到蕉皮，躀咗鋪勁嘅，行情忽然轉淡。
3.1論壇令煲呔出醜
話說波波上屆只係輸畀譚香文幾十票，親北京陣營計過數，若然可以擺平其他大佬，由波波單挑香文姐，冇理由攞唔番個位，因此過去兩年頻頻畀位波波上，煲呔政府又委任佢做多項公職，擺明谷佢知名度，3.1特首候選人論壇，佢仲係其中一個召集人。
不過成也煲呔，敗也煲呔，梁家傑喺3.1論壇攞晒彩，煲呔喺200幾萬觀眾面前𤓓爆，波波即刻俾煲呔啦啦隊隊長狂插，論壇後都唔敢蒲頭。正所謂一沉百踩，有人吹風話波波表現不濟，不如捧過第二個啦。
有會計界大佬同八方講，大行羅兵咸嘅雷添良近年好受政府器重，喺行內有名望，係合適人選，大不了仲可以搵李家祥重出江湖。但八方認為李家祥復出機會唔大，譚香文唔使咁驚。
不過，民主師奶都未必坐得穩，公民黨內部不時傳出由大嶼山區議員容詠嫦出選會計界，民主師奶落直選，跟袋巾條隊排第二，有人話袋巾𠵱家聲勢唔錯，話唔定民主師奶可以博多次大霧，幫公民黨博多一席返嚟！不過睇番民主派喺九東得票，袋巾條隊好難贏多個，難怪八方問民主師奶意願時，佢好堅定咁話一定會爭取連任會計界！