中富控股（1191）由高位0.39元回落，長假前收0.34元，較高位跌咗12.8%；今年初由低位0.15元起步，大升160%，調整完又係另一個吸納機會，以迎接下一個大升浪。
轉型股係近期熱炒對象，升幅可以幾成、一二倍，或甚至幾十倍計，中富極有可能係下一隻急升嘅股份，現時可分段上車，等佢郁。
上月中推介中富，當時股價0.255元，第一個升浪目標0.50元，現時在中途整固，再升破高位，就可向目標價進發。中富「晒士」細細粒，話佢遲早轉型，果然冇錯，𠵱家已開始進軍發電脫硫業務，呢瓣亦「食正」近期熱炒嘅環保概念，「升」途無可限量。
中富已去蕪存菁，賣咗「唔等使」或虧蝕嘅業務，剩番醫護服務，成間公司已好「亁淨」。上月底，踏出轉型第一步，收購有關控制發電時排放二氧化硫之脫硫環保業務。
脫硫業務增長勁
轉型嘅脫硫業務，已經有錢賺，未來幾年增長仲會好勁。中富先收購金田40%權益，作價3.36億元，以現金8000萬元及換股價0.20元的2.56億元CB支付，而金田則持有粵首環保100%，並協議收購廣州粵首全部權益。中富並有權以5.04億元購入金田餘下60%權益。
廣州粵首保證07年（12月年結）及08年兩個年度，每年稅前溢利不少於7000萬元。廣州粵首自行開發脫硫技術，按營運機組的脫硫能力計算，在中國所有脫硫公司排第9位。中國已規定發電廠或企業須於2010年前裝妥脫硫裝置，脫硫市場發展潛力極大。
中富轉型，樂觀估計每年可賺億元，計埋CB換股，現時市值都唔夠7億元，以環保業務保守的PE15倍計，股價仲有一倍嘅上升空間，何況轉型項目，唔會只得一單。
長假前推介世紀城市（355），一日之內大升40%，今日可留意力寶華潤（156），呢隻係大偏低股，好耐冇郁過，假前一抽，大升20%，只係剛剛起步，短線可見0.50元，中短目標係0.70元。力華NAV0.55元，但計埋重估增值，起碼值0.90元，股價咁偏低，大升好應該。