煲呔今次上京見領導人，懶巴閉咁住喺釣魚台國賓館，唔畀記者同市民埋身，可惜未住到入去已經有失威嘢。
話說煲呔一行人噚日晏晝浩浩蕩蕩去到北京機場，呢頭煲呔扮熟一落機飛身去陳佐洱度打招呼時，嗰頭佢哋啲行李就俾人遺留喺機場大堂冇人理。當時有一大群記者等緊攞行李，見到個掛上煲呔大名、仲掛住江西考察團名牌嘅綠色大喼，同曾夫人鮑笑薇嘅行李就咁放喺機場大堂嘅一角。唔知曾班子嘅名單，會唔會就放喺入面呢？
唔止咁呀，隨行嘅新聞處處長邱騰華、特首辦助理處長陳羿，以及特首高級特別助理陳建平嘅行李，一律都放晒喺度任君選擇無人理，直至有行家通知新聞處，先至有人拿拿臨拎走咋。