自從公布NDS要出《真‧三國無雙DS》，相信唔少人都會同筆者一樣懷疑，要喺畫面內塞滿咁多人，NDS究竟頂唔頂得順，當正式推出試玩之後，發覺同玩過嘅無雙作品，完全係另一個風味，始終NDS3D機能係差嘅，所以為咗避免再出現《WENDS》嘅慘況，畫面並無要求太多3D效果，望落去就好似玩緊RPG遊戲一樣，不過仍保留大量敵人嘅傳統，戰場上最多可預備20名敵軍供機迷斬殺！
而角色造型方面，當然唔能夠有PS2無雙效果，不過改為用Q版設計，又有唔少驚喜，而玩家可從三名人物中挑選角色，開戰前要設定卡牌組合，而各武將擁有獨特能力同特殊技，基本有提升我方能力、阻礙敵方前進、防禦力提升等，總數將會有100種之多，戰勝就有機會取得更多卡牌。另外亦可使用各種妨礙技能，如地震、暗雲、寒冰等，即使面對敵人，打起來亦會有較多變化。玩家可能更着眼NDS所提供連線對戰功能，可以一對一，又或最多3人連線，贏出更可獲得敗方卡牌。
同一個畫面下，最多可以同時出現20名武將，NDS處理能力都差不多去盡。
售價：$278
查詢：I-Gamer（27253338）