碧桂園（2007）喺復活節長假期招股，明日截止認購申請，好多朋友都打電話嚟問：「敏妮，你抽碧桂園㗎呵，抽幾多好呀？」
抽一手 一半機會
預咗多人抽，所以碧桂園超額認購倍數應該好容易過100倍。如果超額100倍以上，散戶可以分嘅股份增加到4.8億股，即係48萬手，佔全球發售20%。之前唔少受歡迎新股都係按20%呢個比例，好似中煤能源（1898）、中交（1800）、工行（1398）、招行（3968）同中行（3988），既然係咁，睇吓呢幾隻新股嘅分配情況，可能搵到啲頭緒。
首先，根據最近中煤同中交嘅認購情況，都有近40萬份申請，碧桂園應該唔少得過呢個數，但得嗰48萬手，A組（認購500萬元或以下）同B組（認購500萬元以上）各一半，即係抽一手嘅A組只係得24萬手股份可以分，想博一人起碼有一手就唔使諗嘞！不過，抽一手中煤同中交嘅散戶，有一半人抽到，所以抽一手嘅「值博率」算幾高。
要穩中 花十幾萬
至於抽多啲，抽到機會係咪多啲？可以咁講。雖然越抽得多中籤率越低，但以申請人數計，抽2手嘅人抽中嘅比例，比抽1手嘅多，抽3手又比抽2手嘅多。不過，呢個只係講機會大咗，若果要穩中，中煤要抽25手先穩中1手，中交就要抽20手。以碧桂園招股價計，抽25手要13.59萬元，抽20手要過10萬。
為咗抽1手碧桂園攞十幾萬蚊做本，值唔值呢？市場人士已經好老定話上市見8蚊，走唔甩，即係一手大概賺二千五。即管以抽25手為例，𠵱家先借孖展就唔使諗喇，真金白銀扲13.59萬元出嚟，假設真係中得一手，8日（明日截止，下個星期四收番退票）賺二千五，即係8日嘅回報率有1.84%，以年計回報率近八成四；就算一手都唔中，原銀奉還。計晒數畀你，唔使問敏妮抽幾多喇啩！