吓！又係高達？近排高達真係好Hit，雖然每隔一段時間就有新作，不過仍然持續畀到驚喜玩家，最新《機動戰士SEED連合VS.Z.A.F.T.Portable》又係一隻高達迷同機迷不能不玩嘅遊戲，內容雖然主要係移植PS2版本，令人驚喜嘅係PSP版流暢同操控性，一啲都唔比PS2版差，連玩開Cosplay扮馬沙嘅小琪都話忍唔到手！
記者：許福合
攝影：伍慶泉
闊屏視點激增
作為PS2移植版，新作除咗保留PS2元素之外，當然亦有PSP版特色，首先不能不提嘅係用上PSP嘅闊屏幕，出戰時橫向畫面令到玩家視線角度大增，除咗唔會被介面擋住視線外，當敵人接近時亦會更早發覺，無咁易被人偷襲！再加上今集嘅《連合VSZAFT》仍然係着重近身肉搏戰多過遠程炮擊，當玩家埋身肉搏之時，左右留有較多空位，眼角昅到有人偷偷接近，都可以預早作打算。而機身方面，除咗SEED主角機Freedom同Justice外，仲有脈衝高達等多款機體，部份機體可作變形，可因應任務需要選擇。
保留PS2自由戰鬥玩法
PS2最令人印象深刻梗係自由戰鬥玩法，今次PSP版本亦保留呢個傳統，機體可作全方位移動。而PSP版更可感受到360o戰鬥嘅刺激玩法，配合轉換視點介面，玩家視點經常可保持最佳位置，玩家唔使擔心打到頭暈。《連合VSZAFT》一向注重玩家技巧，如喺空中嘅時候，只有連按兩次跳，就可以高速移動同閃避，係經常使用嘅招數，但要注意Boost使用量。另外，除懂得閃避外，當使用配備盾牌機種，喺避無可避嘅情況下，用盾牌硬擋就可大幅減低傷害，再反擊時就會大大增加勝算。
覺醒提升戰力
有睇《SEED》動畫，可能都記得劇中基拉等主角，遇到事故時會出現能力提升畫面，遊戲之中就即係覺醒能力，唔同角色會有唔同特變技能，以主角基拉或阿斯蘭為例，啓動爆種能力會進入狂戰士狀態，攻防能力都會大幅提升。勁招當然唔可以狂出，要留意覺醒計，儲滿就可以發動。除此之外，畫面仲有個Charge計，當儲滿就可以使用必殺技射擊，只要喺適當時候使用，就可以隨時反敗為勝，可惜未儲滿前係不能作出攻擊，使用時要注意，呢招除咗用嚟殺敵外，要打大型物體好似戰艦，亦特別有效。
Cosplay小琪：操控佳
若果講高達Fans，一向玩開Cosplay嘅小琪必定係其中之一，而且仲專門扮馬沙，發燒到自己做埋Cosplay服，成套馬沙裝都係自己一手一腳，買料買布自己做，真係服咗佢！佢雖然話玩NDS比較多，不過試玩後覺得呢隻PSPGundam操控好好，即使佢啱啱試玩都可以打低敵人。問佢鍾意遊戲中哪部機體，佢就話：「我對機體無咩研究，我玩Cosplay要扮人，所以比較鍾意阿斯蘭同加卡利。」真係100%Cosplay迷！
Profile
主機：PSP
開發：BANDAI
類型：動作
人數：1-2人
售價：$310
查詢：I-Gamer
（27253338）