「交學費」幾乎係每個散戶必經嘅階段，點樣喺股市練就金剛不壞之身，相信連股神畢菲特都唔敢教你，稚筆無畏喺《中金貼吧》就分享咗佢聲稱「用鮮血換來的10條炒股經驗」。
唔信眼淚 只信現金
以下係我用鮮血換來嘅經驗，係對所有股民嘅忠告：
1.記住，你面對嘅係一個充滿無比危險同殺機嘅地方，並唔係處處都執到錢嘅歡樂船。呢度唔相信眼淚，只信現金。
2.你必須先學點樣生存，如果唔係遲早有日被打死或掃出門。
3.寫低啲金句貼喺牆上：「紀律是執行路線的唯一保證」、「止蝕第一」、「鐵的紀律必須執行！」
4.10%係你承擔損失嘅最後一道防線，下跌10%你要堅決沽，理得佢聽日升番100%；沽咗可以買番，但要有買番嘅充足理由。
5.損失10%好似好痛，但起碼你掌握自己嘅命運。股市從來不缺機會，欠缺嘅只係機會嚟，但你仲坐緊艇、無能為力，至係最最痛苦。
6.成功嘅人永遠唔夠10%，呢個係鐵率，你想唔想做吖？
7.你要好似一個深入森林嘅獵人，時時睜大雙眼，就算瞓都要睜開半隻眼，因為陷阱和豺狼無時無刻都昅住你。
8.由年頭到年尾都只識等機會嘅人，係最唔識炒股嘅人，亦係最失敗嘅人。
唔諗尋底 先防摸頂
9.永遠唔好諗尋底，要時時警惕幾時摸頂。
10.除非係最最親嘅親人，否則佢唔會話你聽最正確嘅內幕消息。
網友游客就喺稚筆無畏之外再加幾點心得：「多看少動，動則要穩；寧要知名大價股，不玩不知名的下三欄。」
不過，對於稚筆無畏「含血」寫成嘅炒股經驗，tbgsz就唔係全盤接收，佢話：「我就係常年等機會嘅人，但我嘅收益率喺10%以上。」