地產代理行頭好多嘢都爭住認叻，乜乜賣樓冠軍呀咁，呢啲表面風光嘅嘢，除咗係激勵士氣，仲有好實際嘅作用──生意好，公司盈利高，前線經紀份糧自然豐厚啲，後勤都多啲機會出花紅。
美聯物業啱啱公布，3月份業績表現理想，4月中會向約500個後勤員工，發放相當於五分之三個月薪金嘅特別花紅，假設1萬蚊個月，即係多6000蚊使，認真和味。
美聯執董林鳳芳話，今年已經係第二次派花紅，上次喺2月，每個後勤1000蚊。舊年美聯起碼派過三次後勤特別花紅。至於同一個阿爸嘅香港置業，聽講後勤部門約20人，會有今年首次特別花紅，暫定係2000蚊，好過冇。
3月份佣金創新高
樓市今年個勢未停過，連投資者都久休復出，由上車盤到貴價樓甚至係A貨豪宅都一樣大賣特賣，間間行都話，3月份佣金收入係07年高峯期後單月新高。
假期前中原同利嘉閣已搶先公布，分別會向約500同180個後勤員工派特別花紅，每人四分一個月，美仔雖然遲咗足足6日，但係派嘅錢多1.4倍。呢行鍾意認叻又一明證。
[email protected]