兩日前去到馬可孛羅太子酒店新開的餐廳食飯，坐低有啲口渴諗住叫杯水飲，侍應竟然畀個Menu我叫我揀，心諗我唔係要紅酒喎？原來呢間餐廳的確有30種礦泉水選擇，配合唔同美食時，仲可以將食物的味道更上一層，原來飲水都可以好挑剔㗎！
記者︰王俊榮
攝影︰楊錦文
與菜配合味道更好
裝修中的馬可孛羅太子酒店，地下兩間餐廳BubblesBars及LobbyLounge已於上星期開幕，兩間餐廳Menu一樣，特別之處是以「水漾」的潔淨及脫俗為主題，花時半年搜集世界各地30多款優質礦泉水，全部天然開採，保證健康。悉心配對每款菜式時，令你品嚐菜式與水配合後另一種味覺享受，總廚Danny話︰「30幾種水中，大多數都係香港罕有，無論有氣、冇氣、軟水、硬水各有不同，希望話畀人知水唔係淡而無味，相反仲可以與每道菜的味道互相配合，令食物味道更好。」
牛油果蟹肉配果味醬汁沙律$95
＋有氣Tynant$50
先飲來自英國的Tynant硬水，入口即感到強勁的氣湧入，氣泡多又大，舌頭揦一揦成個人精神晒。刺激過後舌頭加倍敏感，將加有檸檬汁的牛油果連同阿拉斯加蟹肉一齊放入口，更能感到牛油果那種入口即溶的香滑，還有蟹髀肉那種鮮甜多汁冇渣感覺。
香煎雞胸配蒜味薯茸及雜菜$95
＋冇氣LintonPark$45
豆苗下先以意大利雜菜加番茄做成的茄茸醒胃，師傅再按時選用丹麥、法國或巴西嫩雞肉，薄身切以防雞肉嚡口，底層有新鮮即打的薯茸，具有濃蒜香味。整個菜式以「滑」做主題，最好配合澳洲的LintonPark泉水，入口幼滑味道清新，冇氣感覺較Smooth，唔會與雞味互撞。
煎黑椒吞拿魚伴海草沙律$90
＋有氣Okinawa100%
KumejimaSinsousui$50
選用由日本海床深處開採的Okinawa水，配合肉身結實的夏威夷吞拿魚腩，魚肉味稍腥，而礦泉水氣帶點鹹，兩者的鹹味配合得宜，還可稍減腥味。旁邊卷物以日式雜菜及冷麵做成的壽司卷，是一道非常有日本特色的菜式。
其他礦泉水推介
有法國水王之稱的Chateldon1650礦泉水歷史悠久，含大量粗身氣泡，有微微揦口感覺，配以濃味紅肉如豬、牛等最適合。$50
來自意大利的Qvarzia，以藍色三角樽形為標記，屬硬水，氣多幼細，味道偏淡，襯托海鮮而不蓋其鮮味。$45
英國泉水LlanllyrSource分黑、白兩色，前者冇氣味淡，適合於餐後進食甜品時飲用；後者有小量氣泡，能中和較Creamy菜式如醬類意大利粉或飯的膩滯感覺。$45
於香港極罕見的法國Wattwiller冇氣礦泉水，其礦物質味道最能發揮芝士類菜式的味道。$50
Fiji屬少有來自斐濟的泉水，取自高山清澈河床，有獨特清新味道，食甜品後飲用能加強口中的甜溜感覺。$50
礦泉水知多啲
來自美洲、歐洲、亞洲、澳洲，甚至非洲的30多種礦泉水，部份外形獨特似足香水。唔講唔知，每種都有軟硬之分，所謂「軟水」，即是泉水（SpringWater），鈣、鎂含量較低，入口味道較淡；而「硬水」即是礦泉水（MineralWater），含有較高的鈣和鎂，味道帶有較濃的礦物味。
BubblesBar（21136051）
LobyLounge（21136038）
地址︰尖沙嘴馬可孛羅太子酒店大堂
營業時間︰8:00am-12:00mn