日本樂壇天后濱崎步前晚在紅館開騷，由於只此一場，故早前掀起撲飛熱潮。唱家班陳奕迅（Eason）前晚進場偷師，他雖盛讚個唱製作好，但不留情面篤爆步姐個唱有三分一是咪嘴演出，並說：「香港歌手咁做實俾人鬧。」他又透露因工作太忙休息不足，開騷時還睡着了。
濱崎步前晚在紅館舉行「TourofSecret」演唱會，全場爆滿，不少觀眾看騷後都吹捧步姐，偏偏坐貴賓席的陳奕迅卻唱反調，還踢爆步姐的演出有三分一是咪嘴。Eason昨日出席一個港台活動時提到步姐前晚個唱，他說：「真係好抱歉，我三日之內又錄音又拍MV，只係瞓得五個鐘，所以睇演唱會時瞓着咗。步姐行上前時，陳家瑛都撞一撞叫我起身，費事俾人睇到觀眾席有人瞓咗覺。」
難逃法眼
精心掩飾咪嘴瑕疵
Eason強調並非步姐歌迷，今次入場主要觀摩日本人演唱會的製作，他說：「我一向都知日本人演唱會嘅製作好勁，香港好難做到，我入場睇完都覺得好正，所有嘢好揼本。」問到步姐的唱功如何，他欲言又止，猶豫一會才說：「我睇到佢有時係咪嘴，而且成個騷起碼有三分一時間都係，我唔係懷疑佢嘅實力，不過香港歌手咁做實俾人鬧。我知日本好多演唱會，歌手跳舞時都咪嘴，但係日本人做任何嘢都好完美，步姐身邊嘅dancer甚至佢自己都會做啲動作去遮咗呢啲位，要好細心先睇到咪嘴時有少少瑕疵。」
Eason表示絕不是惡意抨擊步姐的唱功，只是說出事實，他又指步姐咪嘴其實不是一個大問題，並說：「呢樣嘢係partof呢個演唱會，所以問題真係唔大。」Eason指麥當娜（Madonna）演唱會跳舞時就沒有咪嘴，他說：「麥當娜會用第二個方法，佢跳舞跳得好勁時就係用把聲去就，嗰刻佢可能唔係唱得最好，一定唔會有CDquality。」Eason給步姐的演出87分，他讚賞結他手的技術、燈光及爆破效果佳，又說：「香港啲爆破係無喇喇都爆一嘢，但步姐一郁隻手，啲爆破就配合佢個動作爆出嚟，好好睇。」對於Eason狠批步姐個唱咪嘴一事，主辦機構東亞娛樂發言人昨日在電話回應說：「佢（濱崎步）冇咪嘴，可能佢唱得太好，加上音響又喺日本運過嚟，所以先令到Eason誤會。」
備受愛戴
吃喝玩樂不願離港
步姐前晚約兩小時的演出中，先後換了八套靚衫，每唱兩首歌曲就入後台更衣，個唱沿用日本及早前台灣個唱的意念，場內逾6,000歌迷聽到步姐唱出金曲如《Boys&Girls》及《SEASONS》時表現興奮。步姐跟fans大晒流利英文說：「I'msonervousbeforetheshow（開騷前我十分緊張）。」又用廣東話自我介紹說：「大家好，我係『Punk』崎步。」昨日是步姐首張細碟《pokerface》推出九周年，故大會前晚安排觀眾哼唱該曲，給步姐驚喜，隨後步姐眼泛淚光地與舞蹈員及演奏者在蛋糕前拍照。為感謝歌迷支持，她也特別把壓軸歌曲《Who...》的部份歌詞改成普通話唱出。
步姐完騷後與老闆林建岳和工作人員到灣仔美味廚消夜，至凌晨2時多再到蘭桂坊的Dragon-i，至凌晨5時才返酒店。步姐原定昨日離港，此行她來港瘋狂吃喝玩樂，流連忘返，所以臨時更改行程，繼續留港狂歡。
採訪：吳嘉浩、李珮洳、卓美娟、魯萍、藍文浩
攝影：葉君海、陳順禎、仇志德、娛樂突發組
最高蘋嬸：
步姐嘅演唱會飛最貴$780，最平$280，如果真係如Eason所講，佢有三分一係咪嘴，咁係咪應該回水三分一呢？
蘋果娛樂特派評述員蘋嬸
