今年係選舉年，之前個特首選舉市民得個睇字，年底區議會選舉就有機會投埋一份，民主派啱啱開始協調選舉擺位，左派快人一步理想達到，已經暗中做嘢，為儲存鐵票做工夫。有個工聯會屬下印刷業工會會員向八方報料，日前收到工會提醒佢登記做選民嘅信，內附選民登記表格㖭。
早兩年有左派社團畀錢人登記做選民，又涉嫌冒人簽名填表，今年收斂啲，只係科水畀個免貼郵票嘅回郵信封，工會成員填好表格寄回，工會就會將表格交畀選舉事務處。工聯會中人話佢哋暫時未有大規模選民登記活動，相信係個別工會自己搞。工會代人交表冇問題，不過八方提醒大家，涉及身份證號碼、姓名等私隱都係小心啲好，自己交表都好方便啫。