古天樂、任達華同林熙蕾等拍攝由徐克、林嶺東同杜琪峯執導嘅新片《鐵三角》，雖然三位導演出名惡，但對呢幾位演員嚟講，佢哋並唔可怕，最恐怖係喺元朗十幾日拍草叢戲時，俾蚊叮到飛起。
一星期唔消腫
林熙蕾同華仔喺戲入面做兩公婆，點知老婆勾佬，同林家棟有路，不過華仔最後都原諒老婆，仲帶佢逃離家棟嘅魔掌，咁啱搭咗古天樂揸嗰架的士。估唔到元朗南生圍嗰度啲草叢有咁多蚊，華仔話：「啲蚊好恐怖，有幾萬隻，我哋每晚要用三、四十支蚊怕水，不過冇乜用，一樣俾蚊叮，一星期都唔消腫，又痕到飛起，搞到我要睇醫生。」
雖然環境惡劣，但現任美國威斯康辛大學麥廸遜分校電影系教授大衞博維爾（DavidDordwell），早排嚟香港出席香港國際電影節之亞洲電影大獎時，獲大會頒發亞洲電影傑出貢獻大獎，佢好欣賞杜琪峯，所以專誠到元朗探班，仲討論吓亞洲電影未來嘅發展。
