時間
96年11月
活動
徐錦江寫真集
人物
徐錦江
經過
娛樂圈好多靚女趁青春有本錢，就出本寫真集賺一筆，不過性格演員徐錦江96年竟然話為藝術，自己有份投資出咗本露何B仔嘅寫真集，認真出位又大膽。
徐錦江除咗赤裸展示人前，仲全身髹上金色顏料，當時傳媒封咗佢叫「啫神」，對呢個稱號，佢似乎好受落。既然喺鏡頭前露何B仔咁大方，睇嚟佢一定對自己嘅命根好有信心，佢話：「佢休息同工作嘅狀態好唔同，可大可小，平時佢好乖好聽話，樣子幾可愛，但工作狀態就充份表現出英雄氣概，一樣咁得人鍾意。」徐錦江講嘅嘢係咪堅嘅，認真無從稽考，不過佢咁有勇氣影全裸寫真，佢太太又好支持，都好令人佩服。
啫神曾經拍過多部三級片，不過自從佢做咗老竇就收斂咗，近年仲轉戰內地，一家三口喺北京住。徐錦江囝囝徐菲唔經唔覺6歲幾，唔知第日佢個仔要仿效阿爸做「啫神」接班人，徐錦江會唔會都大方sayyes呢？
本欄逢周一至周六刊出