大陸遊客來港扮大爺，慘遭「奸商」仿製商品「劏客」，中央台挑撥生事，破壞香港旅遊業和諧，大陸客媽媽聲，話以後唔會再落特區掃名牌消費！
若然係咁，反為係天大喜訊！啱啱逝世嘅小甜甜，佢生前生活儉樸，從來唔着名牌，一身農婦服裝，樸拙無華，人哋三百億身家，都唔會周身意大利法國貨，E一隻高貴嘅情操，唔止香港人要學習，大陸暴發戶，更加要學習！
因此，小甜甜逝世，同皇室鐘錶事件Crossover，就會打孖嚟嘅badnews變goodnews！想化解危機，好易啫，只要旅發局主席田少下令，喺羅湖、皇崗口岸，棟起幾個小甜甜嘅農婦裝紙板人像，追贈小甜甜「節儉生活親善大使」稱號，向自由行同胞宣傳：連小甜甜E位有錢過英女皇嘅中華富婦，都唔會崇尚歐西名牌，生活慳儉，實事求是，想購物消費呀？消費偶像小甜甜有好介紹：去廟街幫襯廿蚊件嘅水貨T恤，同埋30蚊隻MadeInCambodia嘅電子石英錶喇，平靚正，仲有好多背囊鬼佬幫襯，一D都毋須自卑㗎！