潮流興惡搞，講到創惡搞之先河，又玩得最盡嘅，當然非《搞乜鬼奪命雜作》（ScaryMovie）系列莫屬。最近系列當紅班底一年一度回歸，今次搞出《搞乜鬼大製作》（EpicMovie），顧名思義去得更杰更盡，而且玩嘅全部都係荷李活大製作，絕對係投資最大、製作最認真兼玩得最賤嘅惡搞之作。 撰文：戶川淳
今個月19號上映嘅《搞乜鬼大製作》由《搞乜鬼》原裝編導班底上陣，由於今次玩嘅全部都係近兩年美國家傳戶曉嘅A級大製作，笑位人人睇得明，結果齣戲年初美國開畫時，首個周末就以1,920萬美元（約1.5億港元）榮登北美票房冠軍，認真犀利。
騎呢四人幫
《搞乜鬼》系列故事一向無厘頭，今次為寸盡多齣題材完全唔同嘅A級製作，劇情更加無邏輯可言，更將猛片全部改晒名：話說地球上有四個孤兒──包括精通「達聞西密碼」嘅露茜、乘搭「獨蛇嚇機」俾大蛇啜爆嘅蘇珊、「配種特攻」中唯一正常嘅型男彼得、以及玩寸積比力克（JackBlack）主演嘅原作《勞嘈神父摔跤你》嘅摔角神父艾活。
四個主角收到騎呢邀請，齊集「朱古力工廠」拜見掌門人，點知意外由神奇魔衣櫥墜入「魔幻黃國」，仲俾衰格王后輕薄！兜兜轉轉，四人結識咗不文「蝦你波凸」，自命風流嘅「新鐵甘剛」，同鍾意着大DeepV泳裝出城嘅「波叔」，加埋「加臘味海盜」協助下，彼得化身嘅「昭人」強戰回歸，力抗衰格王后最強馬仔──「星箭前傳」外星怪客。係咪亂嚟到爆先？
製作超認真
亂嚟還亂嚟，今集製作非常之認真，例如玩《朱古力獎門人》（CharlieandtheChocolateFactory）同《魔幻王國》（TheChroniclesofNarnia），導演真係搭番個大型布景出嚟，可謂不惜工本，而搞笑角色造型明顯有心思咗，例如由艷星嘉門伊拉查（CarmenElectra）扮演嘅《變種特攻》惡搞妖后，化妝真係媲美正版。
另外磁力王個頭真係有嚿大磁石、《達文西密碼》（TheDaVinciCode）個白化病殺手變咗黑人演、《V煞》（VforVendetta）怪俠面具十足米高積遜（MichaelJackson），都令人笑到甩肺。不過今集嘅不文笑位就似乎過火咗啲，真係兒童不宜呀！