上周打響頭炮，總算有個好開始。去到季尾，冇鬥志嘅中游球隊注定被排除出重點出擊場次，周六焦點集中在最擅長嘅英國波身上，捧韋根平手盤串阿仙奴「大」。
上個禮拜兩日埋單計進帳近千元，檢討得失，英冠卡廸夫城受挫於強中強嘅新特蘭，抵輸！反而伯明翰竟能大炒高雲地利3球，令筆者未能進帳過萬，亦證明高雲地利呢類唔上唔落嘅球隊幾不濟。
勿捧唔上唔落球隊
作為一位球評家，貼士唔上唔落難引起讀者興趣，刻意亂輸扮明燈，亦非自己性格所能做到；故入得呢個戰場，惟有全力進取，望以混合策略迎合唔同捧場客嘅需要。
今日重心場次選韋根讓球平手盤，該隊目前在護級戰僅多尾3嘅查爾頓3分（未計周五賽事），勢難安枕。另外，他們除今戰外，餘下6場會遇到包括維拉、韋斯咸及煞科戰對錫菲聯等下游隊，反而唔易鯁；今次迎戰保頓，其實係搶分良機。
保頓留力食「拖肥糖」
原因保頓踏入下半季，已見跌watt，目前排名料可穩踢下屆足協盃，最重要係兩天後復活節大賽，會返主場大戰另一前列隊愛華頓，意義比今場重要得多；相反韋根近3場主場搶7分，必捧無疑。
次選，阿仙奴對韋斯咸，兩隊目前處境俱要贏波，加上後防同樣不濟，阿仙奴遇對手肯攻，返主場踢順風波唔同計法，博「大」好過買單W啦！
重心出擊
讓球
韋根（平手）
蘋果波神
狂迷英國波，尊崇雲格；成與敗，視乎你是否找到真快樂！