今年幾隻內地新股上市，第一日就升幾成，中籤者無不笑逐顏開，於是碧桂園上市，大家搶住要，左丁山本來諗住抽碧桂園新股嘅機會低過買中「爪皇凌雨」獨贏，唔想落注，不過既然鄭大班推薦，一於入票可也，碰吓運氣都好。其實左丁山未去過碧桂園，唔知佢喺邊。第一次聽見呢個名大約係十年前，當時直銷天后Ｌ（夫婦兩人都係雙鑽石）嘅千金自哈佛商學院讀完MBA，天后Ｌ參加完畢業禮之後，叫左丁山睇相。相片內有一老婦人，穿唐裝白衣黑褲，成個順德媽姐打扮，究竟係邊位呀？
天后Ｌ話：「呢位係我家工人，做咗三十幾年，湊大晒我啲仔女，退休之後返鄉下順德，住響碧桂園。」哦，從此知道有碧桂園呢處地方，以為係順德媽姐退休之地，估唔到人哋做生意咁叻，現在有二十七個碧桂園地產項目，去年（截至十二月底）營業額達七十九億元人民幣，賺十六億七千萬，獲利率有21%。
天后Ｌ位大千金喺哈佛攞MBA，當然威威，最難得嘅係天后Ｌ請埋老工人自順德出嚟，去波士頓參加畢業禮，老工人話出大場面最習慣穿着白綢衣黑褲，於是哈佛大教授MichaelPorter得以見識吓傳統順德媽姐嘅rolemodel，等佢知道吓中國家庭之和諧管理一面。
𠵱家天后Ｌ位大千金已經喺銀行工作，唔知佢會唔會申請碧桂園新股呢？因為見到銀行內攞招股書人頭湧湧，左丁山不禁想起上星期警方破獲一個集團用多份白表申請股票之事。其實呢個集團用假身份證號碼，本身係犯罪；但如果用同一（自己嘅）身份證號碼，用一百份白表申請，點解會犯罪呢？左丁山唔多明白，重複申請要重複畀手續費，並非必贏秘方，一旦衰起嚟，一百份表冇份中，咁就偷雞唔到蝕揸米，又或者份份抽中，點知碰上股市大跌，更加蝕到面青。用同一名字同一身份證重複申請新股，只係博彩而已，政府與監管當局使乜花時間去理呀？警察當局將啲時間去緝拿一千元偽鈔黨好過啦。