愛美係女人嘅天性，更何況係以靚樣搵食嘅女明星呢？不過韓國女星就偏偏相反，唔知係天生麗質難自棄，定係後天加工信心十足，個個唔理好醜都唔介意以真面目示人。阿Net發現最近有網友喺討論區上載咗大批韓國女星冇化妝嘅素顏樣，睇吓你又認得幾多個？
金喜善唔化妝嚇人
公認係小美人嘅宋慧喬，唔知係咪近日忙拍戲少補身，冇化妝時面色似乎黃咗少少，好彩標致嘅五官仲喺度，相信唔會嚇親緋聞男友阿Rain。至於韓國性感一姐李孝利，平日喺舞台上嘅打扮冶艷誘人，迷死唔少異性，而利妹落咗妝個樣一樣吸引，阿Net覺得佢仲多咗一份鄰家女孩嘅氣息㖭。
近年主力喺內地發展嘅韓國女星張娜拉，雖然喺韓劇《開朗少女》入面形象精靈可愛，不過落咗妝嘅佢十足捱咗十晚通宵咁款，一對眼袋同黑眼圈好似我哋嘅國寶安安佳佳一樣！韓劇《天國的階梯》女星金泰希一向有「大眼妹」稱號，一雙水汪汪電眼迷死唔少少男，不過佢冇化妝時，一雙大眼睛明顯跌watt，仲縮細咗好多㖭。
至於有「韓國第一美人」之稱嘅金喜善，喺《神話》入面嘅朝鮮公主打扮貴氣十足，但抹去濃妝艷抹後，竟然成個師奶咁款，相信連成龍都會俾佢嚇親，難怪網友alleyg話：「好誇張唷，還好我不喜歡韓國女人。」
網址： http://bbs.ent.sina.com.cn/?h=/g_forum/00/87/01/view.php%3Ffid%3D31500%26tbid%3D611&g=13&n=1
版主：阿Net
本欄逢周一至六刊出