咁多集《美女廚房》，點解冇袁彩雲份？論美貌，Fiona勇奪96年港姐季軍及國際親善大獎；論廚藝，跟食神韜韜周圍試食，全港飲食版幾乎搵過佢做示範。雖然呢位中德混血兒沒當上美女廚神，但骨子裏卻是一位浪漫車神，在開朗成熟背後，滲透出浪漫氣質，既鍾情德、英車款，更散發出歐洲人追求舒適、簡約嘅品味，如港人般將電視、閃燈等搬入車？NoWay！
文：許一楓
攝影：林栢鈞
場地提供：BeriaRio（25683993）
入得廚房、出得廳堂
老實講，Fiona一直係小記心目中嘅女神，唔單只靚得自然，一眼望上去仲好高貴大方，每次螢幕上見到佢，都有種令人好舒服嘅感覺。
為咗配合佢識飲識食嘅形象，我哋專誠搵咗間靚盡鯉景灣嘅餐廳嚟做訪問，老闆仲相當客氣，借出場地兼攞埋飲品招呼我哋。本來一身便服嘅Fiona，原來特登帶多套長裙嚟影相，連身兼低胸長裙，加多件中袖外套，斯文得嚟又帶點性感！連出名挑剔嘅光頭攝影師，都認為Fiona真人靚過上鏡好多！
學車學到喊
為咗要將架車同餐廳拉近距離，我哋想將架車駛上行人路靠近餐廳，小記嗰刻有啲怕Fiona會嫌麻煩，點知我一出聲，佢一句NoProblem，一身長裙、高踭鞋Look就上車踩油，直駛上行人路泊位，想唔到斯文外表嘅背後，都帶有點點辣味。
見Fiona一手軚泊車、手勢純熟，睇位準確，原來十幾年前喺德國考牌考到喊！「淨係筆試都考咗兩次，啲問題好鬼陰人，兼且錯3題就肥佬，嗰刻真係好失落，諗起要再等3個月先可以重考，卒之忍唔住喊咗出嚟！」
直至考路試，Fiona終於可以一Take過，但過程中佢依然係大喊包，「嗰位教車師傅之前教過我家姐，佢對我兩姊妹都好嚴，仲話我泊車曳，經常鬧到我喊！」正所謂嚴師出高徒，否則今時今日點可以咁瀟灑泊到S位？
載人載貨做司機
有十幾年揸車經驗，Fiona坦言最享受揸車嗰下清風送爽、望住街上人來人往嘅畫面，「我唔鍾意飛車，但係我EnjoyDriving，而且車廂空間只屬我自己，感覺好Privacy！」
以為Fiona一心只想揸架車享受個人空間，原來仲有下文，「以前我揸Audi，但對咗8年有啲悶，之後一見架Jaguar就好鍾意，一來符合愛歐洲車嘅要求，二來空間闊落，我𠵱家鍾意打羽毛球同Golf，尾廂一定要大，所以我好滿意呢架車！」
管接送、傾密偈
Fiona坦言揸住架大車載朋友四圍去係最開心，但被問到有無同男朋友喺車度發生過浪漫史？Fiona只害羞地表示，有幾次同男性朋友喺架車度都遇過啲難忘嘅趣事，「有次男朋友嘅Daddy因為順路車埋我返工，但佢怕人誤會係我男朋友，所以我一落車就大大聲咁叫唔該Uncle；另一次係男性朋友揸住架開篷車同我上山頂，不過大家純粹朋友傾偈，感覺好得意，因為望住成個香港夜景，嗰刻已經係一個好浪漫嘅時刻！」
Jaguar首款旅行車
英國Jaguar當年推出X-Type車系，主要是為了針對年輕用家市場，當中除了四門房車版外，其後更推出了Estate旅行車版，而這款旅行車更成為了廠方有史以來的第一款旅行車！
在外形設計上，Estate旅行車版跟四門房車版沒有太大分別，車頭仍以四圓燈示人，但尾廂卻要大得多，容積達1,415公升，用來擺放３個大型行李篋都NoProblem；此外，引擎蓋下的一台2.1公升V6引擎，更是以慳油好力見稱，加上一套5前速自動波箱，性能表現可謂毋庸置疑。
JaguarX-Type2.1Estate規格
引擎：2,099c.c.V6DOHC
馬力：157ps/6,800rpm
扭力：20.5kgm/4,100rpm
傳動：5前速自動波，前輪驅動
當年售價：$368,800
現時二手價：約$260,000起
