韓劇《大長今》兩年前風靡全港，油麻地天主教小學食住韓流，用大長今奮發經歷做公民教育教材，油天咁欣賞韓國文化，南韓駐港領事都訪問過該校，領事館仲三番四次邀請學生去南韓交流，今個月中終於成行去南韓四日，呢個消息，連當地《朝鮮日報》都有報道。
同小長今交流
帶隊嘅梁主任話團中31個學生都係資優生，佢哋會觀摩韓國傳統文化，又會參觀電器商三星廠房，亦會同飾演小長今嘅小演員趙貞恩及當地小學生交流。校方提醒學生唔好帶屋企套韓服去，因為首爾方面覺得香港買到嘅唔正宗，想着嘅話，嗰邊會提供。
呢程除咗玩都要上堂同做功課，梁主任話南韓政府會逐步喺中、小學推行用TabletPC代替教科書，而油天又早已用TabletPC教英文，佢哋會分享呢方面教、學經驗；校長就要學生返嚟寫份報告上呈煲呔，促請政府畀全港學校用TabletPC代替教科書，又要喺當地做街訪，了解韓人點睇香港。呢團四日行程每人要2,900蚊，全部自費。