為遷就復活節大賽，是日並無英國波可選擇，退而求其次，惟有重心推介荷蘭波，捧回起中嘅飛燕諾兼入球大；變倍器則為蘇超2哥格拉斯哥流浪，1.42倍單W非常穩陣。
格羅寧根作客腳軟
飛燕諾喺主力不斷流失下，今屆喺荷甲無復霸氣係不爭事實，上場作客1球險勝維廸斯後，才結束4連和嘅差勁走勢；他們主觀意願係頂住海倫芬，守住個第5位，參加季後嘅歐聯資格附加賽。其實個人認為呢班波就算達標，去到季後賽都係陪跑，不過有一線機會，當然唔會放過，今次返到主場，就算仍有隊長盧捷斯養傷，而兩名翼衞布積斯同埋德倫特停賽，相信以前鋒查列斯廸斯、老將雲可當同埋快翼卡斯廸倫嘅質素，會主攻一舉擊敗作客成日腳軟、但又係要頂住個足協盃附加席位嘅格羅寧根；呢場開「大」應該冇走雞。
格流[-1]照捧可也
另一場捧勝在穩陣嘅蘇超「2哥」格拉斯哥流浪；上周末國際賽後主場失分，今次作客對尾2嘅聖美倫，對家剛在周中苦戰迫和喜伯年，今次好難擋得住唞咗成個禮拜嘅格流咯。蘇超第2名可以踢歐聯外圍賽，對格流極為重要，該會今戰後要去到21日先大戰赫斯，心無旁騖，必全力一戰，單W搵嚟串吓其他場次固然好，冒進者可以捧埋個「讓球主客和」嘅「客勝」。
重心出擊
入球大細
飛燕諾「大」
蘋果波神
狂迷英國波，尊崇雲格；成與敗，視乎你是否找到真快樂！