劉燕卿坐正做消委會第二任總幹事，八方見到佢梗係要恭喜一番。劉燕卿成世人只係打過消委會呢份工，八方以為佢好專一，多口問佢最愛是誰，點知佢話有兩個至愛。咁花心？係都唔同八方講啦，兩個「愛人」，一個係老父，另一個係阿哥。
劉燕卿大談兩個「愛人」
劉燕卿話老父退休多年，但鍾意寫信教佢做人道理，令佢諗通唔少工作同生活上嘅煩惱；阿哥仲叻，大學畢業後俾獵頭公司獵咗去新加坡，加盟美國電腦公司HP，兩兄妹一樣，大半世人打一份工，阿哥喺新加坡HP一直升到做CEO，舊年退休。
佢話阿哥都醒佢唔少好嘢，幾年前多得阿哥指點，消委會先順利推出《選擇》月刊網上版；𠵱家電盈固網電話用戶可以打電話睇《選擇》，呢個全球獨一無二嘅功能，都係阿哥教路先搞得成。