「花兒」近年重返公仔箱拍戲，捱更抵夜都係為兩餐，但佢個爛滾老公「等過期」趁老婆開工，就更加冇王管，成日夜蒲媾女之餘，仲吓吓對新相識嘅女伴毛手毛腳，極之冇品。
乘機抽水
早排等過期參加派對，向啲靚女自我介紹時，已經乘機搭膊攬腰抽水。其間佢同一位靚女坐埋一邊吹水，明明冇嘢撈、靠老婆養活嘅等過期仲話自己喺商界長袖善舞，講到眉飛色舞之際，等過期唔小心掃跌酒杯，搞到靚女條褲濕晒，佢居然唔用放喺枱上嘅紙巾，一嚟就用手幫對方抹酒，係咁摸人大髀，靚女固然被佢嘅唔規矩行為嚇咗一跳，在場賓客見佢抽水咁狼死亦都睇唔過眼。諗唔到花兒英名一世，𠵱家仲要捱餐死養埋等過期呢條大滾友，關仁都戥佢陰功。
Textby關仁