我們經常鼓勵讀者：「有心聽音樂，最好買黑膠唱片。」除黑膠有獨特音頻，也可令髮膚感愛音樂，其收藏價值亦頗有趣，只要參考往績、睇表現，低價買入放在唱片櫃，放長線釣大魚，等佢升值賺番筆。
無良心？有市有價又好聽嘅嘢，有邊個無興趣先？我們就揀出10隻有前景又好聽的保值黑膠正碟，再幫呢批碟起底估價，教你昅實個「黑膠市」。
記者︰劉昱蘭 攝影︰陳偉強、伍慶泉
TOP1
閔惠芬《天弦》
升值實力
上隻碟被炒高10倍，新碟連CD都有炒價，1,000套黑膠分勻全中國。
憑名氣加碟數量少，碟評人David敲定佢會突圍。「國寶級閔惠芬，以前隻CD《江河水》都有炒價，仲升價10倍，喺旺角百幾炒到千幾蚊。《天弦》嘅CD反應好好，上晒國內流行榜，黑膠就只出1,000套，香港都未必分到好多貨，肯定成為「短炒王」。
估計炒勢︰半年後有升10倍水位。
《天弦》半年後應開始炒到$600，過咗年半，炒到$1,500價位絕對唔出奇，加上國寶級人馬，而國內開始玩鍾意「炒」，所以時間越耐價越高。
TOP2
DireStraits《BrothersInArms》
升值實力
只印1,500隻，無行貨。
香港無行貨，只有水貨，量少定必升價，原因係有灰色政治位；喺美國，DireStraits屬於華納，但喺香港簽咗環球，環球點會問華納攞貨呢？隻碟錄音技術仲係母帶刻印，過1,500隻就傷母帶，所以數量頂盡只得1,500隻。
估計炒勢︰2年$800。
1年去到$600唔難，但流行曲碟嘅炒價始終輸蝕啲，2年左右斷咗版時，可以炒到$800。
TOP3
Rossini《SonateAQuattro》
升值實力
碟跟號碼，賣完就無。
音色靚絕，幾十年都仲讚緊佢嘅演繹同錄音一流，碟評人David話要打孖上，一隻自娛一隻炒，咁先至賺到盡。
再版新碟肯定量少，仲罕有地跟號碼，講明賣完收手，靚Number可滿足虛榮心，可以炒高啲﹗
估計炒勢︰古典長線投資
古典音樂炒價較慢，但耐力好，年多先Double，擺多幾年過千唔難，其他Rossini舊作二手市場現價2千至3千都有。
TOP4
蔡琴《機遇》
升值實力
細規模公司出，有話題貨量少。
《無間道》嘅梁朝偉用《被遺忘的時光》嚟試機之後，後生仔女呢一輩都識得蔡琴。《機遇》係蔡琴最靚錄音碟之一，發燒友實有隻二手傍吓身試吓機，呢批新碟仲要少量，因為唔係台灣唱片公司出，係劇場製作公司自己錄，規模細量自然少，又係要爭崩頭。
估計炒勢︰有前科有機上$700
阿Paul話蔡琴響1985最靚聲嘅時候錄咗隻《老歌》，幾年前《老歌》香港版最高價時炒到$700，《機遇》兩年後都有潛力問鼎呢個價位。
TOP5
CincinnatPopsOrchestra《RoundUp》
升值實力
舊版80年代一出即斷。
耳熟能詳嘅MagnificentSeven，槍聲同音效現場一樣，不過一般唱盤未必唱到，硬件要求頗高；80年代出過黑膠，好快斷市，因為佢紅得神秘，今次有一定炒力。
估計炒勢︰隱憂唔係限量版。
阿Paul話隻碟有個隱憂，就係唔係限量，炒價要睇唱片公司會唔會出多批，如果大量，頂盡Double。
TOP6
NatKingCole《TheKingOfSound》
升值實力
難搵，同名牌Crossover。
NatKingCole嘅碟唔易搵，呢隻新版仲同TivoliAudioCrossover，充滿50、60年代味。限量3,000套，但NatKingCole咁渴市，絕對炒得起。
估計炒勢︰多Fans搵碟，即炒起。
TOP7
《無比傳真》
升值實力
CD大賣，黑膠有望。
中國十大民樂名家高峯時期的精采錄音，如閔惠芬嘅《江河水》，呢個版本係10多年前錄音版，10個猛人最Top時期之作，CD亦大賣。
估計炒勢︰最少2倍。
TOP8
《秋思幻想曲》
升值實力
名牌出品，𠵱家已有炒味。
古箏大師李煒及二胡老手宋飛合作，加上FIM靚聲之作，𠵱家已經開始有人炒緊，再唔入貨就太遲。
估計炒勢︰聲靚試機碟，最少Double。
TOP9
《紫釵記》
升值實力
任白戲迷渴求大。
任白三寶中較為好賣，𠵱家出再版，可以歎番靚聲，但又係數量少喎，所以都好多人昅實，上位有望。
估計炒勢：碟價貴，令水位細，但長炒長有。
TOP10
《LaFilleMalGardee》
升值實力
罕有炒碟種類。
David話香港黑膠人幾鍾意聽芭蕾舞音樂，就算嗰隻唔係發燒碟都有市有價，所以呢隻名指揮家JohnLanchberry出手嘅「女大不中留」，要趁貨尾入貨喇。
估計炒勢：耐力夠，要放長線。
當炒碟霸《審死官》
$40升價100倍
舊版《審死官》夠膽死升價100倍，由80年代嘅$40炒到今時$4,000，仍有人如獲至寶好開心咁捧走。當年賣$40係街坊價，咁多貨都炒得起係因為𠵱家影音雜誌谷到隻碟好緊要，話佢音色靚傳真度高，搞到個個都攬住唔放，形成難求嘅碟霸。
搵對象嚟炒
不同買家 碟界4種發燒友
黑膠有得炒，因為市場上有不同品味嘅買家，以下係4大種不同品味的黑膠友，聽音色、貪懷舊、靚封套、專玩Single︰
David：專業碟評人，追求錄音質素。「市場炒到幾千蚊隻碟唔係人人歎得到，新碟二百零蚊仲包保有質素，唔會花咗聽唔到，當然歡迎黑膠出新版。」
Paul：二手黑膠多到索性舖頭做埋屋企，新碟行情要知但專玩舊碟，鍾意佢嗰種唔完美嘅懷舊味道。
John：做設計鍾意聽歌，當年買黑膠係買封套設計，唔少黑膠拎返屋企但未聽過。「𠵱家啲CD細細隻無幾多位玩設計，所以齋講封套，黑膠迷都大把嘢講。」
Joe：舊時好鍾意買7吋細碟Single，尤其係中森明菜嘅，貪Single夠新夠快，電台Hit歌已經可以同步出到，而且有時Single出咗唔再出大碟，Single就好珍貴。
3大買碟處
NO.1 歐美入貨 尋罕有新碟
九龍灣嘅Encore門市連倉佔地3,000呎，古典音樂多達10萬，頗具規模，而且全部碟均從歐美入貨，有好多市面難求嘅碟，都可以喺度搵到，搵新版碟或者未拆過嘅舊碟都Ok。
EncoreHiFiCo
地址︰九龍灣宏開道19號健力工業大廈6樓18室
電話︰23181387
網頁︰www.encorehifi.com
NO.2 專賣全新再版碟
新發行黑膠通常重量約200克，比以前的120克黑膠質素更佳，碟身無咁易彎曲，三通音樂就專賣全新再版碟。
三通音樂
地址︰旺角荷李活商業中心8樓802室
電話︰27966373
NO.3 就腳HMV
各大HMV賣黑膠嘅貨架唔多，但種類和數量較大眾化，$80都有交易。
3大賣碟估價處
NO.1 網上拍賣
如果你有幾隻喺手，先放一隻出嚟試吓反應，其餘慢慢放慢慢抬高價錢都仲得。估價網頁通常剩係啱外國碟，可以參考以下外國網頁︰
http://www.recordcollector.co.uk/
http://www.gemm.com/
http://www.musicstack.com/
NO.2 鴨寮街阿Paul
喜歡黑膠碟的人一定識得阿Paul，而且同佢講碟傾得埋又熟市價，可以搵佢問吓個價去到邊，或者幾時放係放碟位。
Paul唱片
地址︰深水埗長沙灣道239號惠康大廈5樓D室（地鐵站C1出口旁）
電話︰98417136
NO.3 英文歌去易手寶
易手寶係英語粵語流行曲集中地，想放英文碟可以去試一試。
易手寶
地址︰中環域多利皇后街11號2樓
電話︰25599562
唱片封套一樣炒
黑膠封套都有吸引之處，睇吓業餘收藏者John同Joe咁，手頭有啲碟，淨係個包裝，已經有價有市，不過佢哋話價值還價值，唔捨得賣喎︰
NO.1
《TheVelvetUnderground&Nico》，拆開黃色蕉皮，粉紅色蕉肉，夠玩嘢。
NO.2
無乜人知道Bjork11歲已出黑膠碟，隻碟有佢當時個樣，限量版得1,000隻。
NO.3
水底BB做封面好經典，《NevermindSessions》仲親身落水。
NO.4
JimiHendrix當時用裸體做封面，唔好講當年，𠵱家都唔夠膽。
NO.5
當年中森明菜嘅Look梅艷芳都抄，你話夠唔夠潮經唔經典？
6大當炒條件
除了我們介紹的Top10黑膠，其實你亦可自己考眼光入貨，根據碟評人講，以往被炒的黑膠，都有以下6個條件：
NO.1 Artist紅貨量少
Artist紅係基本條件，加上物以罕為貴先會有炒價。好似NorahJones《NotTooLate》，佢紅但唱片公司見有市不停加印，難炒得起。
NO.2 半年內去晒貨
黑膠碟好少一出斷市，要等半年先炒，大概年零就會去到高位，但記住古典音樂係玩耐力嘅，等得就擺多幾年先放最值錢。
NO.3 「半速母帶刻印」錄音
有種叫做「半速母帶刻印」（HalfSpeedMaster）嘅技術，係由母帶直接錄落新碟度，即係上面DireStraits《BrothersInArms》用嘅技術，最原汁原味入，若印多過1,500隻會傷咗母帶，所以一有呢個字眼，即係高質量少，完全符合當炒條件。
NO.4 唱片公司「灰色位」
好似Top2嘅《BrothersInArms》，或者DireStraits，呢類歌手唔同國家簽唔同唱片公司，搞咗啲尷尬灰色位，變咗只有水貨市場，又係炒碟嘅最佳條件。
NO.5 睇準Fans情意結
阿Paul話張國榮有隻《情人戰》係當年倉底貨，但𠵱家炒到$2,000！試吓上啲Fans網兜售，可能會有意想不到嘅價位。
NO.6 熟讀背景
唔同歌手都有佢嘅高峯時期，例如蔡琴最靚聲係1985年，當時台灣飛碟版《老歌》靚過香港版，台灣版即炒3倍，想賺錢要付出啲時間心機。