「爪皇凌雨」與日本馬「賞月」揚威杜拜，贏晒啲歐洲馬，威風到極。四月二十九日星期日跑女皇盃（二千米），各地一級靚馬來港，「爪皇凌雨」有主場之利，必成眾矢之的。「賞月」有「女皇盃」與「冠軍一里賽」（千六米）可揀，本來「賞月」已經贏過一場千六米，如果贏埋四月二十九日嗰場，可得額外花紅獎金一百萬美元。一百萬美元噃！少錢呀？哈，點知日本馬主要名唔恨錢，一跑完杜拜大賽，未收到馬會正式邀請之前，已經運隻馬嚟香港，四月三日就到，一於提早熟悉本港氣候，作最佳準備，與「爪皇凌雨」決一高下。記唔記得舊年十二月跑香港國際賽香港盃，法國馬「Pride」跑第一，「賞月」第二，「爪皇凌雨」第三，練馬師霍利時賽後大罵騎師杜鵬志騎得差。𠵱家雨過天青，大家開心晒，碰到「賞月」來港挑戰，精彩可期。
「賞月」放棄贏取一百萬美元花紅嘅機會，係要同「爪皇凌雨」鬥過，日本馬主嘅決心、雄心的確令人佩服。呢啲就係體育精神嘛，跑馬唔係一定講錢嘅。講起「爪皇」系列，一位老友問馬主（周家）以前有一隻馬「爪皇飛電」是否有典故。經熟讀三國演義嘅肥仔Ｋ提醒，睇番《三國》第二十回「曹阿瞞許田打圍」，曹操逼漢獻帝田獵，自己騎一匹靚馬上陣，呢隻馬就係叫做「爪黃飛電」，馬主周為馬取名「爪皇飛電」，相信係由此而來。
海外馬來港參加大賽，時間容易安排。普通馬主要運隻馬嚟香港，要搞好耐㗎。馬主Ｈ等人夾份養馬，隻馬喺澳洲養咗一年，三歲生日前運嚟香港，四月三號就要到指定馬場檢疫隔離，三個禮拜後乘飛機來港。要等到五月七號，到港後再檢疫隔離兩個星期，近五月二十一號先至可以運返馬房，畀馬主Ｈ見吓，再要踱步慢操快操，未到六月尾都未有狀態，即係話下一季先至可以跑。澳洲牧場話：「隻馬操得好好，有狀態！」有鬼用咩，隔離被迫休息個半月，隻新馬都呆晒，要從頭嚟過啦。