對女人嚟講，唔怕無情人做老處女，最怕撞着個賤男搞到自己一身蟻，可惜天下間嘅賤男多的是，究竟點樣可以憑外表知道身邊嘅男人係咪賤男一族呢？點為之賤？咪係好色、以性行先、𡁻完鬆，一於揭露10種賤男面相，教你觀貌察「色」。
記者：區佩嫦
資料提供：方海閱
（www.fonghoiyue.com.hk）
No.1
汗毛代表性慾，汗毛越濃密代表性慾越強，報復心亦較重，一衝動起上嚟容易做出失控嘅行為；而頭髮粗硬兼鬈，性格則較暴躁，易有暴力傾向，若有齊呢兩個特徵，性慾更強，分分鐘會變成變態色魔！
化解方法︰將汗毛脫去，多做HairTreatment令頭髮變順滑。
No.2 黃褐眼白 情場殺手
眼白帶微黃褐色嘅人，相學上稱為「茶眼」，擁有呢種眼相嘅人，睇起嚟好有魅力，容易引到異性暈其大浪。如果呢位仁兄雙眼嘅距離闊（闊過兩隻手指位），更加會用自己嘅魅力嚟玩弄女性，以女性為洩慾工具，絕對係情場殺手。
化解方法︰若想減少異性投緣，可戴眼鏡以減輕影響力。
No.3 鼻高眉揚 玩完即棄
鼻高而眉揚嘅人，為人心頭高，不甘平凡。若用喺正途上，為人很積極進取，奮鬥心很強，會係一位成功人士；但若用喺旁門，佢係位掠奪心強嘅人，以搶走人女友或老婆為榮，以炫耀自己的非凡魅力，而且仲會玩完即棄，小心！
化解方法︰戴眼鏡有助減輕其影響力；空餘時進修，將精力轉移。
No.4 太陽穴飽滿 三妻四妾
男人嘅太陽穴飽滿，再加上眼尾有兩條或以上嘅魚尾紋，呢位男人經常會有三妻四妾的幻想，特別喺三十歲後性慾更為旺盛，婚後往往會有婚外情，分分鐘衰到同一時間有多過一個情人，以滿足有三妻四妾嘅慾望。
化解方法︰喺太陽穴及眼尾多搽眼霜，以保持平滑，減少魚尾紋嘅出現。
No.5 凸腮骨 武力迫對方
男人腮骨凸嘅話，代表喜愛激情，其私慾較強，若伴侶配合唔到嘅話，甚至會用武力迫對方就範。有呢種相格嘅男人，性格也較為衝動，情緒起伏較大，好容易一時衝動做出越軌嘅行為。
化解方法︰留長頭髮遮掩腮骨，同時學習靜坐，以減低心中的自私慾念。
No.6 舌頭尖長 𠱁女專家
舌頭尖長者好識營造氣氛，加上頭腦靈活，滿口甜言蜜語，𠱁人暈得一陣陣，是情場殺手。因身邊女人太多，往往唔理對方，發洩後就𡁻完鬆。
化解方法︰家中插白花、用花瓣沖涼。
No.7 露牙肉 𡁻完鬆
露牙肉或哨牙、嘴歪或說話時歪嘴，呢位仁兄口才一流，識𠱁異性歡心，可惜無句真，𠱁女上床唔肯負責任，係臭男人。
化解方法︰多睇宗教書改善性格。
No.8 眼頭有肉 愛拈花惹草
近眼頭又圓又多肉，感覺脹卜卜，代表對性慾需求大，結咗婚都會到處拈花惹草，而且最喜歡向無知少女埋手。
化解方法︰戴眼鏡，少吃蝦蟹等。
No.9 鴛鴦眼 風流情種
左右眼大小相差好大，相學稱為「鴛鴦眼」，佢交際手段高強，對異性有一手，係一位風流情種，到處留情。
化解方法︰戴眼鏡，多做善事。
No.10 人中有紋 偷食賤男
笑時人中有橫紋，呢啲紋叫「通姦紋」，為人愛偷食，淫起上嚟連老婆嘅女友都照搞，係賤男中嘅極品。
化解方法︰可用留鬚，減影響力。
Top人辦有話說
中6個賤男相：「我不是淫賊！」
記者卓看到Top10性慾強賤男，發現有6個地方非常相似，包括嘴、眼、人中有紋、多汗毛兼鬈髮等。有乜感想：「老實講，我都算係賤男，性慾好強，中學時代已偷買《龍虎豹》創刊號，睇完放響後樓梯防煙門側，去旺角採訪色情場所，個心又發晒姣咁。不過賤男唔等於淫賊，我係有道德、有目的、有意識地去鹹濕，並唔係見到波波籮籮就發神經。」
