亞洲女首富龔如心因卵巢癌逝世，終年70歲，與她相識40年的上海幫世交好友、卓能集團主席趙世曾，現身在東南亞公幹，他表示會回港出席故友喪禮。趙世曾昨日接受本報電話訪問說：「大家識咗40年，係一場朋友，當然係好可惜同唔開心啦。」龔如心患癌後，趙世曾便沒與她再見面，但他透露爭產官司令小甜甜大受打擊，使她「冇心情打理身體」。 記者：林妙萍
趙世曾早年在家族公司華光航業當董事總經理，與龔如心因在又一村毗鄰的物業界線問題上有糾紛而認識。他透露兩人結緣於六、七十年代，「60年初已經識得佢兩公婆，識咗40年喇，喺小甜甜身上，你係完全體會唔到身家億萬有錢人嗰啲氣燄，佢唔鍾意過火出風頭，為人好謙虛，好低調，但又好精明。」
68至69年大家第一次合作，搞又一村地產項目，後來，我哋大家上海人咪一齊搞（地產）囉，嗰時南豐陳生（南豐主席陳廷驊）都冇做咁多（生意）。」
愛巡地盤當做運動
由於兩家人同樣來自上海，一樣從事地產投資，故十分投契，華光於七十年初至八十年代中期，與華懋有二十、三十個聯營的地產合作項目，因此趙世曾常與王德輝一起投地，而王氏夫婦則多次請教他上市事宜，閒時也會結伴遊船河，由於趙熟悉台灣，更曾帶兩人到當地遊玩。
趙世曾對龔如心最深刻的往事，是她愛親自到建築地盤巡視的習慣，趙世曾說：「佢兩公婆做人好勤力，樣樣都親力親為，最深刻係王太好鍾意行地盤，佢去到地盤就自己行上行落，當做運動，仲話（行地盤）係佢最大嘅運動量。如心廣場埋尾時，我都喺荃灣撞到佢巡完地盤，當時佢都好精神。」
「生癌後唔畀人見」
趙世曾表示知道龔如心患癌後，一直深居簡出，他說：「我知佢生癌，但佢病咗之後都唔畀人見。」賭王何鴻燊日前指聽聞龔如心因吝惜金錢，故延誤治療而不治，趙世曾動氣否認說：「冇呢啲事！我相信，可能嗰時打官司太忙，疏忽咗身體，嗰個官司，尤其係第一次輸（指02年在爭產案中敗訴，並被指偽造遺囑），對佢係一個好大嘅打擊，都冇時間、冇心情去打理身體，唔關孤寒事，睇病都冇得孤寒！」他續說：「佢生前身體幾好㗎，冇乜大病，做運動就係同佢老公去騎馬，以前我哋遊船河，佢都有去，但就唔會落水。」
深信遺產自有安排
據龔如心生前透露，其大部份遺產將捐作慈善用途，趙世曾說：「我唔知，咁佢知道自己生命有限，都一定會做安排。」提到其女兒趙式芝與龔如心上契，趙世曾解釋說：「我哋大家都係上海人，當時工作啦，私人嘅關係都好好，芝芝係我第一個女，一出世咪上契咗畀佢囉。」
此外，趙世曾弟弟趙世光的太太何琍琍，在上海接受本報電話訪問時透露近年甚少見到龔如心，她說：「當然好可惜啦，印象中嘅佢係好sweet，好nice。」
